У Ватыкане абмяркоўваюць дапамогу Усходнім Цэрквам
Аляксандр Панчанка – Vatican News
Сустрэча распачалася 21 чэрвеня 2022 года з Боскай літургіі, якую цэлебраваў прэфект Дыкастэрыі па справах Усходніх Цэркваў і старшыня ROACO, кардынал Леанарда Сандры. Падчас яе ўдзельнікі пасяджэння маліліся за мір і за ахвярадаўцаў. Яны даверылі Пану і заступніцтву Багародзіцы плёны асамблеі і краіны, якім будзе аказана дапамога, у прыватнасці тыя, што пакутуюць ад вайны і грамадска-палітычнай нестабільнасці.
Удзельнікі сустрэчы засяродзіліся ў першую чаргу на сітуацыі ў Святой Зямлі, пра якую распавялі Апостальскі дэлегат у Іерусаліме, арцыбіскуп Адольфа Ціта Ільяна, кусташ Святой Зямлі, айцец Франчэска Патон, і віцэ-канцлер Бэтлеемскага ўніверсітэта, айцец Пітэр Брэй. Апостальскі нунцый у Ліване, арцыбіскуп Джозэф Спірэці, паінфармаваў пра грамадска-палітычную і рэлігійную сітуацыю ў гэтай краіне.
У другой палове дня ўвага ўдзельнікаў нарады будзе прысвечана Эфіопіі і Сірыі. З дакладамі выступяць Апостальскія нунцыі ў гэтых краінах, адпаведна арцыбіскуп Антуан Камільеры і кардынал Марыё Дзэнары. Завершыцца першы дзень пасяджэння справаздачай Сакратара па адносінах Апостальскай Сталіцы з дзяржавамі, арцыбіскупа Пола Рычарда Галахера, адносна дыпламатычнай дзейнасці Святога Пасаду ва Украіне, на Блізкім Усходзе, у Эфіопіі і Эрытрэі.
22 чэрвеня праца форума будзе прысвечана сітуацыі ва Украіне: па відэасувязі аб абстаноўцы ў краіне распавядуць Вярхоўны Архіепіскап Кіева-Галіцкі Святаслаў Шаўчук і Апостальскі нунцый, арцыбіскуп Вісвальдас Кульбокас; аб экуменічнай сітуацыі раскажа кардынал Курт Кох, прэфект Дыкастэрыі па спрыянні хрысціянскаму адзінству; а пра гуманітарную і дабрачынную дзейнасць паінфармуе дырэктар “Карытас Украіна” Таццяна Стаўніча. Прагучаць таксама сведчанні некалькіх сем’яў, якія пацярпелі ад вайны, і валанцёраў.
23 чэрвеня ўдзельнікаў 95-я пленарнай сесіі Асамблеі ініцыятыў дапамогі Усходнім Касцёлам прыме на аўдыенцыі Святы Айцец.
