Францішак спачувае ў сувязі са смерцю Эбе дэ Банафіні

Марыя Валодзіна – Vatican News

У сваім лісце Пантыфік узгадаў “смеласць і адвагу” Эбе дэ Банафіні, яе “здольнасць ператварыць боль страты ў нястомны пошук абароны правоў самых маргіналізаваных і нябачных”.

У лісце на іспанскай мове Святы Айцец выказаў глыбокія спачуванні ўдзельніцам грамадскага руху, якія цягам 45 гадоў выходзяць на вуліцы Буэнас-Айрэса, каб заклікаць да справядлівасці і правасуддзя ў дачыненні да сваіх дзяцей, бясследна зніклых у час ваеннай дыктатуры ў Аргенціне. Папа заклікаў іх працягваць справу Эбе дэ Банафіні.

“У гэты момант смутку, - гаворыцца ў лісце, - я хачу быць побач з вамі і з усімі тымі, хто аплаквае яе сыход".

Папа ўзгадаў сустрэчу з Эбе дэ Банафіні ў Доме святой Марты 28 мая 2016 года, адзначыўшы, што яму асабліва запомнілася “яе гарачае жаданне даць голас тым, у каго яго няма”.

Двухгадзінная гутарка была адзначана слязьмі, абменам думкамі, успамінамі, а таксама просьбай аб прабачэнні: Эбе дэ Банафіні, якая ў мінулым востра крытыкавала Папу, прызналася, што памылялася, і папрасіла аб прабачэнні. Францішак не толькі прыняў прабачэнні, але і схіліўся перад глыбокім смуткам маці, якая бачыла, як яе дзеці – Хорхе Амар і Рауль Альфрэда – зніклі ў нябыт, як і многія іншыя дысідэнты аргентынскага рэжыму.

“Яе смеласць і адвага ў часы, калі панавала маўчанне, абуджалі і затым падтрымлівалі пошук ісціны, памяці і справядлівасці”, - напісаў Францішак. “Пошук, дзеля якога яна кожны тыдзень выходзіла на марш”, каб у грамадстве і гісторыі не панавала забыццё, каб абавязацельства клапаціцца адзін пра аднаго было лепшым “проціяддзем ад перанесеных жорсткіх злачынстваў”.

Эбе дэ Банафіні не прапусціла ніводнага маршу памяці. У агульнай складанасці яна прыняла ўдзел у 2036 дэманстрацыях, першая з якіх адбылася 30 красавіка 1977 года вакол піраміды Майя. Яна заўсёды прыходзіла на маршы ў белай хустцы, якая стала сімвалам яе арганізацыі. Паплечніцы адзначылі яе смерць вялікім малюнкам хусткі на тратуары Буэнас-Айрэса.

“Прыйшоў час яе апошняга маршу, і мы суправаджаем яе малітвай, каб Пан дараваў ёй вечны супакой”, - піша Святы Айцец. Тым, хто працягвае яе барацьбу, ён параіў “не дапускаць, каб усё добрае, што было зроблена, было страчана”.

У Аргенціне ў сувязі са смерцю Эбе дэ Банафіні абвешчана трохдзённая жалоба.