Папа ў Нядзелю Божага Слова: патрэбна наватарскае прапаведаванне

“Адчуем жа пакліканне самога Езуса абвяшчаць Яго Слова, сведчыць аб Ім у штодзённых сітуацыях, жыць Ім у справядлівасці і любові, “уцелаўляць Яго”, з пяшчотай ставячыся да цела тых, хто пакутуе”, - заклікаў Папа.

Аляксандр Амяльчэня - Vatican News

22 студзеня 2023 года Францішак прамовіў гамілію падчас Імшы ў Нядзелю Божага Слова. Яна прайшла ў ватыканскай базыліцы з удзелам тысяч вернікаў.

Пантыфік нагадаў, што Божае Слова скіравана да кожнага, а яго абвяшчэнне павінна стаць прыярытэтам Касцёла. “Давайце вучыцца ў Езуса ставіць Слова ў цэнтр, пашыраць нашы межы, адкрывацца на людзей, нараджаць вопыт сустрэчы з Панам, ведаючы, што Божае Слова канкрэтызавалася не ў абстрактным і статычным выглядзе формул, але мае дынамічную гісторыю, створаную людзьмі і падзеямі, словамі і ўчынкамі, прагрэсам і напружанасцю”, - заўважыў Папа.

Падчас Імшы ў Нядзелю Юожага Слова

Святы Айцец падкрэсліў, што Божае Слова заклікае да навяртання, мы ўсе знаходзімся пад яго ўладай. Яно фарміруе нас, навяртае і патрабуе ад нас з’яднанасці ў адзіным Касцёле Хрыста. Пантыфік заахвоціў вернікаў задумацца, якія аспекты іх жыцця патрабуюць змены і навяртання?

Францішак нагадаў, што Божае Слова стварае прапаведнікаў. Бо мы пакліканы быць лаўцамі людзей. Наша місія заключаецца ў тым, каб шукаць “згубленых, прыгнечаных і знявераных, каб прынесці ім не саміх сябе, але суцяшэнне Слова, наватарскае абвяшчэнне Бога, якое перамяняе жыццё, радасць ад усведамлення таго, што Ён – Айцец, што Ён звяртаецца да кожнага”.

Напрыканцы сваёй гаміліі Папа падзякаваў усім, хто ўдзельнічае ў прапаведаванні Божага Слова і ставіць яго ў цэнтр жыцця Божага народа.