У базыліцы святога Пятра пачалося развітанне з Бэнэдыктам XVI
Марыя Валодзіна – Vatican News
Задоўга да 9 гадзін раніцы перад базылікай святога Пятра выстраілася вялікая чарга вернікаў, якія прыйшлі аддаць апошнюю даніну памяці пастыру, які прысвяціў малітве за Касцёл апошнія гады свайго жыцця.
Сярод першых, хто прыйшоў сёння ў базыліку, каб развітацца з Бэнэдыктам XVI, былі прэзідэнт Італіі Серджа Матарэла і прэм'ер-міністр Італіі Джорджа Мелоні.
Цела Папы-эмерыта было перанесена сёння раніцай з кляштара Mater Ecclesiae у базыліку святога Пятра да алтара споведзі. Яно прабудзе там тры дні, з 2 па 4 студзеня. Чакаецца, што ў гэтыя дні развітацца з Папам-эмерытам прыйдзе ад 30 да 35 тысяч чалавек штодня.
Паводле прэфекта Рыма Бруна Фратасі, чакаецца, што ў пахавальных урачыстасцях, якія 5 студзеня ўзначаліць Францішак, прыме ўдзел каля 50-60 тысяч чалавек.
