Францішак заклікаў Папскія ўніверсітэты да супрацоўніцтва
Марыя Валодзіна - Vatican News
Папа заклікаў выкладчыкаў і студэнтаў Папскіх універсітэтаў стаць хорам. Універсітэт, па сутнасці, гэта школа сугучча розных галасоў, месца, дзе розныя веды і перспектывы гарманічна дапаўняюцца, карэктуюцца і ўраўнаважваюцца. Гэтая гармонія патрабуе, каб яе культывавалі перш за ўсё ў самім чалавеку, у трох інтэлектах, якія вібруюць у чалавечай душы: інтэлектах розума, сэрца і рук.
У прыватнасці, Папа спыніўся на апошнім з трох інтэлектаў: інтэлекце рук, узгадаўшы выпадак, які адбыўся з ім на плошчы святога Пятра, падчас сустрэчы з групай сляпых. Адзін юнак папрасіў дазволу дакрануцца да Папы, каб пабачыць яго. “Гэта вельмі ўразіла мяне і дазволіла зразумець інтэлект рук”, - сказаў Францішак, дадаўшы, што Арыстоцель параўноўваў рукі з душой, а Кант называў іх знешнім мозгам чалавека.
Але рукі павінны быць адчувальнымі, не скупымі, дзіравымі рукамі, якія марнуюць час, здароўе і таленты, адмаўляюцца ціснуць іншыя рукі, узнімацца да неба ў малітве, - звярнуў увагу Папа, нагадаўшы пра рукі Хрыста, якія бяруць хлеб і келіх, дакранаюцца да цела і крыві, і “дзякуюць, таму што адчуваюць, што ўсё гэта - дар Айца”.
Пантыфік запрасіў гасцей супрацоўнічаць, стаць хорам, які складаецца з розных кампанентаў акадэмічных устаноў, факультэтаў і ўніверсітэтаў. Памяншэнне колькасці студэнтаў і выкладчыкаў рызыкуе рассеяць каштоўную энергію, запаволіць і згубіць евангельскую радасць вучэння і даследавання. “Мы павінны прыняць гэта да ведама”, - папярэдзіў Папа.
Асабліва пасля пандэміі “неабходна пачаць працэс, які прывядзе да эфектыўнага, стабільнага і арганічнага ўзаемадзеяння паміж акадэмічнымі ўстановамі, каб лепш выконваць канкрэтныя мэты кожнай з іх і спрыяць універсальнай місіі Касцёла”, - падкрэсліў Пантыфік, заклікаўшы разглядаць гэты працэс не як “дзеянні, накіраваныя на барацьбу з скарачэннем эканамічных і чалавечых рэсурсаў”, а як “імпульс да будучыні, як запрашэнне прыняць выклікі новай гістарычнай эпохі”.
