Папа: кананічнае права служыць збаўчай місіі Касцёла
Аляксандр Панчанка – Vatican News
Святы Айцец звярнуў увагу на сувязь паміж евангелізацыйнай місіяй Касцёла і кананічным правам. На першы погляд яны могуць здавацца дзвюма цалкам рознымі сферамі, але, на самой справе, не могуць існаваць адно без другога, бо ў цэнтры кананічнага права знаходзяцца “даброты камуніі, у першую чаргу Божае слова і сакрамэнты”.
“Кожная асоба і кожная супольнасць мае права на сустрэчу з Хрыстом, і ўсе нормы і прававыя акты імкнуцца спрыяць сапраўднасці і плённасці гэтай сустрэчы”, - заўважыў Францішак, нагадваючы, што найвышэйшы закон кананічнага права – збаўленне душ.
Пантыфік згадаў словы Бэнэдыкт XVI, які заклікаў семінарыстаў любіць кананічнае права і памятаць, што “супольнасць без права была б супольнасцю без правоў”. “Ваша праца датычыцца норм, працэсаў і санкцый, але ніколі не павінна губляць з поля зроку правы, ставячы ў цэнтр вашай дзейнасці людзей”, - сцвердзіў Францішак, дадаючы, што правы – гэта аб’ектыўная рэальнасць, якая павінна быць прызнана і абаронена. Ён нагадаў сваім гасцям пра адказнасць за дапамогу ў ззянні праўды справядлівасці ў жыцці мясцовых Касцёлаў, што робіць вялікі ўклад у евангелізацыю.
Папа адзначыў таксама важнасць ведання і вернага захавання кананічных норм, пазбягаючы “пазітывісцкага выкарыстання канонаў для пошуку зручнага вырашэння прававых праблем”, каб не заганяць жыццё людзей у пастку фармалісцкіх і бюракратычных схем, якія закрываюць сабой сапраўдныя правы.
“Не забывайце пра найвялікшы прынцып евангелізацыі: рэальнасць – вышэйшая за ідэю, канкрэтнае жыццё – вышэйшае за фармальнасць. Рэальнасць заўсёды вышэйшая за ўсякую ідэю і гэтай рэальнасці трэба дапамагаць праз права”, - сказаў Святы Айцец, заклікаючы сваіх гасцей да прававой праніклікасці, якой дапамагае здольнасць слухаць і малітва.
Пантыфік заахвоціў касцёльных правазнацаў вырашаць свае задачы ў сінадальным духу, не баяцца прасіць парады і меркавання ў больш адукаваных і дасведчаных людзей, маючы пакорнае і пастаяннае жаданне вучыцца ўсё лепш і лепш служыць Касцёлу ў гэтай сферы.
“Супрацоўнікі суда ніколі не павінны забываць, што яны займаюцца пытаннямі, якія маюць моцнае пастырскае значэнне”, - дадаў Францішак, заўважаючы, што іх працай заўсёды павінны кіраваць патрэбы праўдзівасці, даступнасці і разумнай хуткасці. Не павінен быць занядбаны таксама абавязак рабіць усё магчымае для прымірэння паміж бакамі або пацвярджэння сапраўднасці іх саюза, - сказаў Папа.
