Францішак: акіяны - Божы дар для ўсіх пакаленняў
Марыя Валодзіна - Vatican News
Час правядзення мерапрыемства супаў з перамовамі дзяржаў-членаў ААН, якія ў Нью-Ёрку прыйшлі да пагаднення аб ахове сусветнага акіяна.
У папскім пасланні за подпісам кардынала Дзяржсакратара П’етра Параліна падкрэсліваецца важнасць “пакоры, падзякі і пашаны” да нашага акіяна.
“Сузіранне і вывучэнне акіянаў дазваляе нам зразумець складаныя і дзіўныя механізмы і раўнавагу, якія пануюць у акіянах, а таксама ацаніць ролю акіянаў у жыцці ўсіх нас, не толькі прыбярэжных супольнасцяў”, - адзначыў Папа, дадаючы, што жыццё ўсіх людзей залежыць ад акіянаў, і яны па праве лічацца “агульнай спадчынай” чалавецтва. Паводле Францішка, акіяны былі дадзены нам “як дар Творцы”, і таму неабходна карыстацца імі справядліва і ўстойліва, каб перадаць будучым пакаленням.
Папа заклікаў палітыкаў і бізнес-лідэраў прыняць бачанне інтэгральнай экалогіі ў адпаведнасці з яго энцыклікай Laudato si ’. Ён адзначыў, што акіяны сутыкаюцца з цэлым шэрагам пагроз, у тым ліку з забруджваннем, акісленнем, незаконным рыбным промыслам, прамысловым асваеннем марскога дна.
Пантыфік узгадаў таксама шматлікія трагедыі гібелі мігрантаў у адкрытым моры, а таксама цяжкае становішча маракоў. Ён заклікаў урады прызнаць “узаемасувязь і ўзаемазалежнасць супольнасцяў і краін”, увасабленнем якіх з'яўляюцца акіяны. “Мы адна сям'я, мы маем адну і тую ж неад'емную чалавечую годнасць і жывем у агульным доме, пра які закліканы клапаціцца”, - нагадаў Францішак.
Папа прапанаваў тры напрамкі для паляпшэння ўзаемаадносінаў чалавека і акіяна. Па-першае, па яго словах, неабходна “прыслухацца да клічу бедных і Зямлі”, гэта значыць “тэрмінова перагледзець стратэгіі росту, заснаваныя на марнатраўстве і няўстойлівых мадэлях спажывання”. Па-другое, чалавецтву неабходна аб'яднацца “для абароны і аднаўлення марскіх, прыбярэжных і рачных экасістэм”. Нарэшце, па-трэцяе, урадам неабходна стварыць эфектыўныя “сістэмы кіравання” для рэгулявання і каардынацыі дзейнасці ў сусветным акіяне. Калі працаваць у гэтых кірунках, “заўсёды будзе надзея”, - заключыў сваё пасланне Францішак.
