Папа: копцкія мучанікі будуць уключаны ў Рымскі мартыралог
Аляксандр Панчанка – Vatican News
11 мая 2023 года Францішак сустрэўся ў Ватыкане з Патрыярхам Копцкай Праваслаўнай Царквы Тавадрасам ІІ. Аўдыенцыя была прымеркавана да 50-годдзя візіту ў Рым у 1973 годзе Патрыярха Шэнуды ІІІ і яго сустрэчы з папам Паўлам VI.
Святы Айцец нагадаў, што гэта была першая сустрэча прадстаяцелей Каталіцкага Касцёла і Копцкай Праваслаўнай Царквы: падчас яе была падпісана хрысталагічная дэкларацыя, якая паклала канец тэалагічнаму супрацьстаянню, што сягала каранямі да Халкідонскага Сабора, а таксама створана Міжнародная сумесная камісія па дыялогу паміж Каталіцкім Касцёлам і Копцкай Царквой.
“Гэта сумесная камісія адкрыла шлях для з’яўлення плённага тэалагічнага дыялогу паміж Каталіцкім Касцёлам і ўсёй сям’ёй усходніх праваслаўных Цэркваў”, - падкрэсліў Пантыфік.
Францішак згадаў, што 10 гадоў таму сустракаўся з Ватыкане з Патрыярхам Тавадрасам ІІ, які прапанаваў тады ўстанавіць Дзень копцка-каталіцкага сяброўства, што адзначаецца цяпер кожны год. На шляху сяброўства Цэрквы суправаджае Бог, а таксама мучанікі, якія сведчаць, што няма большай любові, калі хто аддае жыццё за бліжняга, - сказаў Папа.
“У мяне няма слоў, каб выказаць маю падзяку за каштоўны дар рэліквій копцкіх мучанікаў, забітых у Лівіі 15 лютага 2015 года. Яны былі ахрышчаны не толькі вадой і Духам, але таксама крывёй, якая з’яўляецца зернем адзінства для ўсіх вучняў Хрыста. Я рады абвясціць сёння, што са згоды Вашай Святасці, гэты 21 мучанік будзе ўключаны ў Рымскі мартыралог як знак духоўнага адзінства, што лучыць дзве нашыя Царквы”, - сказаў Пантыфік.
Святы Айцец пажадаў, каб малітва копцкіх мучанікаў і Багародзіцы працягвала дапамагаць умацаванню сяброўства і адзінства паміж Цэрквамі. Пасля прадстаўлення афіцыйных дэлегацый і абмену падарункамі Францішак і Тавадрас ІІ накіраваліся ў капліцу Redemptoris Mater у ватыканскім Апостальскім палацы, дзе памаліліся разам.
