Спачуванні Папы пасля смерці біскупа Бетацы – удзельніка Сабора
Аляксандр Амяльчэня - Vatican News
Папа ўспамінае яго “як вялікага падзвіжніка Евангелля, які вызначаўся блізкасцю да бедных, стаў прароцкім знакам справядлівасці і міру ў асаблівыя перыяды гісторыі Касцёла, а таксама як чалавека дыялогу і арыенціру для шматлікіх дзеячаў грамадскага і палітычнага жыцця” ў Італіі, - гаворыцца ў тэлеграме, падпісанай кардыналам Дзяржсакратаром П’етра Паралінам. Удзячны Богу за “бясстрашнага сведку Другога Ватыканскага Сабора”, Францішак просіць Уваскрослага Пана даць яму “вечную ўзнагароду, абяцаную верным слугам”.
У лістападзе біскупу Бетацы павінна было споўніцца 100 гадоў. Іерарх удзельнічаў у Другім Ватыканскім Саборы. Быў пастырам італьянскай Іўрэйскай дыяцэзіі на працягу 33 гадоў і старшынёй руху Pax Christi на працягу 17 гадоў. У Італіі ён вядомы як аўтар шматлікіх публікацый і прыхільнік дыялогу з няверуючымі.
