Аўтабіяграфія амерыканскай актывісткі Дораці Дэй з прадмовай Францішка

ПАПА

Францішак пра актывістку Дораці Дэй і яе служэнне бедным

Святы Айцец напісаў прадмову да аўтабіяграфічнай кнігі амерыканкі Дораці Дэй, ініцыятаркі каталіцкага рабочага руху, журналісткі, пісьменніцы і пацыфісткі, якая прысвяціла сваё жыццё бедным і маргіналізаваным людзям.

Марыя Валодзіна - Vatican News

Кніга пад назвай Я знайшла Бога дзякуючы Яго бедным. Ад атэізму да веры: мой унутраны шлях (Ho trovato Dio attraverso i suoi poveri. Dall’ateismo alla fede: il mio cammino interiore) выйшла ў выдавецтве LEV і з’явіцца ў кнігарнях 22 жніўня 2023 года.

У прадмове да кнігі Папа адзначыў, што жыццё Дораці Дэй (1897-1980) з'яўляецца адным з сведчанняў таго, што Касцёл расце дзякуючы не празелітызму, а прыцягненню. Людзей з Богам збліжаюць не чалавечыя намаганні і хітрыкі, а міласэрнасць, прыгажосць і любоў, якая праяўляецца ў канкрэтных справах і ўчынках.

Пантыфік вылучыў у аўтабіяграфіі Дэй тры аспекта, якія, на яго думку, уяўляюць каштоўнасць і ў наш час: духоўны пошук, Касцёл, служэнне.

Дораці Дэй піша, што прыйшла да Бога не за суцяшэннем у моманты страху і болю, а таму што імкнулася да радасці. Па словах Папы, яе духоўны пошук “можа шмат чаму навучыць нас, захаваць у нас праўдзівы вобраз Бога”.

Што да стаўлення Дораці Дэй да Каталіцкага Касцёла, то, на думку Францішка, яна ўмела бачыць у яго жыцці нязломную сувязь з Богам, нягледзячы на шматлікія і неаднаразовыя падзенні яго прадстаўнікоў. Яна была ўпэўнена ў Боскай прыродзе Касцёла. “Толькі Боская ўстанова магла перажыць здраду Юды, адмаўленне Пятра, грахі многіх вернікаў, якія павінны былі клапаціцца пра бедных", - піша яна, дадаючы, што не стала бы ўскладаць на Касцёл віну за “чалавечыя слабасці, грахі і невуцтва тых, хто займае высокія пасады”, а таксама за “памылкі святароў”. Гэтымі словамі, лічыць Папа, Дораці Дэй прызнае, што Касцёл “мае непасрэднае дачыненне да Бога”, што гэта Яго, Боская, а не чалавечая рэальнасць, з дапамогай якой Ён можа дасягнуць нас.

Усё сваё жыццё Дораці Дэй служыла бліжнім. Барацьба за справядлівасць была для яе спосабам, з дапамогай якога “кожны чалавек можа ажыццявіць мару Бога аб прымірэнні чалавецтва”. Яркая, бескарыслівая любоў з'яўляецца “пробліскам любові Бога да чалавека”, “лепшым, што нам дадзена зведаць у гэтым жыцці”, - лічыла Дэй. На думку Святога Айца, гэта вучыць нас таму, што “вернікі і няверуючыя з'яўляюцца саюзнікамі ў служэнні годнасці кожнага чалавека, калі яны любяць самых апошніх і служаць ім”. Такім чынам, для таго, каб справядлівасць перамагла, служэнне павінна стаць нашым канкрэтным палітычным выбарам. Прыклад Дораці Дэй, якую Папа ўзгадваў у Кангрэсе ЗША падчас апостальскага падарожжа 2015 года, павінен натхняць нас на гэтым цяжкім, але захапляльным шляху.