Францішак правёў кансісторый па прызначэнні новых кардыналаў

Марыя Валодзіна – Vatican News

Урачыстая цырымонія прайшла ў прысутнасці амаль 12 тысяч чалавек - хрысціянскіх вернікаў, сем'яў, афіцыйных дэлегацый з розных краін свету, палітычных і рэлігійных дзеячаў.

Кардынальскі берэт і пярсцёнак з рук Святога Айца атрымалі 20 кардыналаў з чатырох кантынентаў. Адзін з новапрызначаных кардыналаў, ксёндз Луіс Паскуаль Дры, 96-гадовы манах-капуцын, які цягам многіх гадоў спавядае ў санктуарыі Маці Божай Пампейскай у Буэнас-Айрэсе, не змог здзейсніць падарожжа. Ён атрымае берэт з рук арцыбіскупа Буэнас-Айрэса.

Кансісторый стаў дзевятым у пантыфікат Францішка. Кардынальскую годнасць на ім атрымалі: арцыбіскуп Роберт Фрэнсіс Прэвост, прэфект Дыкастэрыі па справах біскупаў; арцыбіскуп Клаўдыё Гуджэроці, прэфект Дыкастэрыі па справах Усходніх Цэркваў; арцыбіскуп Віктар Мануэль Фернандэс, прэфект Дыкастэрыі веравучэння; арцыбіскуп Эміль Поль Шэрыг, апостальскі нунцый; арцыбіскуп Крыстоф Луі Іў Жорж П’ер, апостальскі нунцый; арцыбіскуп П'ербатыста Піцабала, Лацінскі Патрыярх Іерусаліма; арцыбіскуп Кейптаўна Стывен Брыслін; арцыбіскуп Кордавы Анхель Сіста Росі; арцыбіскуп Багаты Луіс Хасэ Руэда Апарысьё; арцыбіскуп Лодзінскі Гжэгаж Рысь; арцыбіскуп Джубы Стэфан Эмею Марцін Мула; арцыбіскуп Мадрыдскі Хасэ Коба Кана; арцыбіскуп-каад'ютар Таборы Пратасэ Ругамбва; біскуп Пенанга Себасцьян Фрэнсіс; біскуп Ганконга Стывен Чоў Сау-Ян; біскуп Аяча Франсуас-Ксав’е Бусціё; дапаможны біскуп Лісабона Амерыку Мануэль Алвеш Агіяр; генеральны настаяцель салезіянаў Анхель Фернандэс Арцімэ.

Акрамя таго, у склад Калегіі кардыналаў увайшлі іншыя прадстаўнікі духавенства: арцыбіскуп Агасціна Маркета, апостальскі нунцый; арцыбіскуп-эмерыт Куманы Дыега Рафаэль Падрон Санчэс; капуцын Луіс Паскуаль Дры, спаведнік у санктуарыі Маці Божай з Пампеі ў Буэнас-Айрэсе.

Зараз Калегія кардыналаў налічвае 242 іерархі, 138 з якіх маюць права голасу на наступным канклаве.