Святы Айцец: рэлігіі служаць дабру, гармоніі і надзеі

Марыя Валодзіна - Vatican News

У сваёй прамове Папа параўнаў чалавецтва з супольнасцю качэўнікаў, якія вандруюць па зямлі, скіраваўшы позірк да неба. Зямля і неба нагадваюць пра два асноўных вымярэння чалавечага жыцця: зямное, у якім мы будуем адносіны з людзьмі, і нябеснае, у якім мы шукаем тое, што вышэй за нас.

На думку Францішка, ужо сам факт правядзення гэтай сустрэчы сведчыць аб тым, што рэлігіі валодаюць велізарным патэнцыялам служэння грамадству. Калі б кіраўнікі нацый выбралі шлях сустрэчы і дыялогу, яны б унеслі “вырашальны ўклад у спыненне канфліктаў, якія працягваюць прыносіць пакуты столькім народам”, - адзначыў Святы Айцец.

Мангольскі народ з’яўляецца прыкладам суіснавання прадстаўнікоў розных рэлігійных традыцый на працягу гісторыі. Аб гармоніі і павазе да адрозненняў сведчыць той факт, што ў старажытнай сталіцы Каракаруме дзейнічалі святыні розных канфесій, - зазначыў Папа.

Пантыфік нагадаў пра каштоўнасць альтруізму, якой павінна "вымярацца" кожная рэлігія. Альтруізм стварае гармонію, а там, дзе існуе гармонія, існуе ўзаемаразуменне, росквіт, прыгажосць і чысціня сэрца. У той час як аднабаковае навязванне, фундаменталізм і ідэалагічны прымус руйнуюць братэрства, распальваюць напружанасць і падрываюць мір, - папярэдзіў ён.

Рэлігіям наканавана несці свету гармонію, якой не можа дасягнуць тэхнічны прагрэс, бо ён накіраваны на зямное вымярэнне і рызыкуе забыцца пра неба, для якога мы створаны. Папа назваў удзельнікаў сустрэчы “сціплымі спадчыннікамі старажытных школ мудрасці”, якія могуць узбагаціць чалавецтва, дэзарыентаванае ў сваёй недальнабачнай пагоні за прыбыткам і мірскімі выгодамі.

Азія можа шмат прапанаваць у гэтым кірунку, а Манголія, якая знаходзіцца ў самым сэрцы азіяцкага кантынента, захоўвае вялікую спадчыну мудрасці. Пантыфік звярнуў увагу на дзесяць аспектаў гэтай спадчыны: захаванне традыцый нягледзячы на спакусы спажывальніцтва, павага да старэйшых і продкаў, клопат аб навакольным асяроддзі, каштоўнасць маўчання і ўнутранага жыцця, беражлівасць, гасціннасць, здольнасць супраціўляцца прыхільнасці да рэчаў, салідарнасць, прастата і экзістэнцыяльны прагматызм.

Пантыфік прызнаўся, што, рыхтуючыся да падарожжа, быў зачараваны юртамі. На яго думку, юрта ўяўляе сабой чалавечую прастору: у ёй праходзіць жыццё сям'і, гэта месца сяброўскага суіснавання, сустрэч і дыялогу, а таксама арыенцір для тых, хто заблукаў на шырокіх прасторах Манголіі. Але акрамя чалавечай прасторы, юрта мае і духоўнае вымярэнне – зверху ў яе пранікае прамень, асвятляючы хатні алтар і нагадваючы пра першынства духоўнага жыцця.

Папа нагадаў духоўным лідарам пра вялікую адказнасць: іх паводзіны не павінны супярэчыць вучэнню, становячыся падставай для скандалу. Неабходна пазбягаць “блытаніны паміж верай і гвалтам, святасцю і навязваннем, рэлігійным шляхам і сектанцтвам”, - папярэдзіў Пантыфік.

У плюралістычных грамадствах, якія вераць у дэмакратычныя каштоўнасці, такіх як Манголія, кожная канфесія, якую прызнаюць грамадзянскія ўлады, абавязана і, перш за ўсё, мае права прапаноўваць тое, чым яна з’яўляецца і ў што верыць, з павагай да сумлення іншых і з імкненнем да найбольшага дабра для ўсіх.

Каталіцкі Касцёл мае намер пайсці менавіта па гэтаму шляху, "цвёрда верачы ў экуменічны, міжрэлігійны і культурны дыялог", прапаноўваючы людзям і культурам скарб сваёй веры і захоўваючы стаўленне адкрытасці да таго, што могуць прапанаваць іншыя рэлігійныя традыцыі, - сцвердзіў Святы Айцец.

Паводле Францішка, усе рэлігіі маюць аднолькавую годнасць, а міжрэлігійны дыялог з'яўляецца прыкметай таго, што надзея магчымая. Папа заклікаў удзельнікаў сустрэчы развіваць надзею на тое, што сумесныя намаганні па дыялогу і пабудове лепшага свету не марныя, і што малітва і братэрства з'яўляюцца сведчаннем духоўнасці і сумеснай вандроўцы з позіркам, звернутым да неба.