Францішак запэўніў у малітве за ахвяр дарожнага здарэння ў Венецыі
Пантыфік спачувае ў сувязі з гібеллю людзей у выніку падзення з эстакады ў Венецыі аўтобуса з турыстамі, сярод якіх былі дзеці. У выніку аварыі загінуў 21 чалавек.
Аляксандр Панчанка - Vatican News
Францішак выказаў сваю блізкасць сем’ям ахвяр, запэўніваючы ў асаблівай малітве за загінулых і просячы Бога аб хуткім выздараўленні для параненых. Адмысловую спачувальную тэлеграму ён скіраваў за подпісам кардынала Дзяржсакратара П’етра Параліна на імя Патрыярха Венецыі Франчэска Маральі.
Дарожнае здарэнне адбылося вечарам 3 кастрычніка 2023 года ў Местрэ, прадмесці Венецыі. Сярод ахвяр трагедыі грамадзяне Украіны, Румыніі, Германіі, Партугаліі, Харватыі, Паўднёва-Афрыканскай Рэспублікі і Італіі. 15 чалавек былі шпіталізаваны з траўмамі, сярод іх трое дзяцей. Дзесяць з пацярпелых знаходзяцца ў аддзяленні інтэнсіўнай тэрапіі.
06 кастрычніка 2023, 08:35
