Францішак сустрэўся са святарамі Рымскай дыяцэзіі
Аляксандр Панчанка - Vatican News
Сустрэча праходзіла за закрытымі дзвярыма. У ёй бралі ўдзел пастыры 38 мясцовых парафій, а таксама некалькі бальнічных капеланаў. Размова працягвалася каля дзвюх гадзін.
Святары маглі задаць пытанні Святому Айцу. Гаворка ішла пра розныя аспекты душпастырскай дзейнасці Касцёла, такія як праблемы і патэнцыял парафій у гістарычным цэнтры Рыма, дапамога пажылым людзям і мігрантам, падрыхтоўка да Юбілею 2025 года, прыняцце пілігрымаў.
Дапаможны біскуп Рымскай дыяцэзіі Бальдасарэ Рэйна зазначыў, што Папа ахвотна распавядаў пра свой святарскі досвед і даў некалькі парад адносна пастырскага служэння ў цэнтры вялікага горада. Удзельнікі сустрэчы выказалі сваё задавальненне візітам Пантыфіка і яго бацькоўскім клопатам.
Візітам у рымскую базіліку Святога Крыжа ў Ерузалеме Францішак завяршыў серыю сустрэч з духавенствам пяці сектараў Рымскай дыяцэзіі, мэтай якіх быў свабодны абмен думкамі і абмеркаванне актуальных тэм, звязаных з душпастырствам.
