Францішак сустрэўся з прадстаўнікамі чатырох манаскіх ордэнаў

Аляксандр Амяльчэня - Vatican News

У сваёй прамове Пантыфік звярнуўся да Сясцёр Дамініканак Місіянерак Святога Сікста, Сясцёр Таварыства Найсвяцейшага Сэрца Езуса, Сясцёр Прадстаўлення Найсвяцейшай Панны Марыі ў Храме і Таварыства Божых Пакліканняў (айцы-вакацыяністы).

Францішак засяродзіўся на трох ключавых аспектах манаскага жыцця: распазнаванні, фармацыі і міласэрнасці.

Гаворачы пра распазнаванне, Папа падкрэсліў яго важнасць у штодзённым жыцці, не толькі ў момант прыняцця важных рашэнняў, але і ў паўсядзённых сітуацыях. Ён заклікаў манахаў і манахінь быць уважлівымі да падказак Духа Святога і мець адвагу прымаць рашэнні, якія адпавядаюць Божай волі.

Што тычыцца фармацыі, Папа нагадаў, што манаскае жыццё – гэта пастаянны шлях росту ў святасці. Ён заахвоціў прысутных да штодзённай малітвы, як асабістай, так і супольнай, а таксама падкрэсліў важнасць адарацыі. Святы Айцец адзначыў, што толькі той, хто сам пастаянна знаходзіцца "ў фармацыі", можа быць добрым настаўнікам для іншых.

Асаблівую ўвагу Пантыфік надаў служэнню бедным і патрабуючым. Ён нагадаў, што ўсе чатыры ордэны былі заснаваныя для падтрымкі і адукацыі маладых людзей, якія не мелі сродкаў для належнай адукацыі. Францішак заклікаў прысутных не забывацца пра свае карані і працягваць місію дапамогі патрабуючым, падкрэсліваючы, што менавіта ў служэнні бедным мы сустракаем Хрыста.

Папа таксама закрануў тэму сучаснага грамадства, адзначыўшы, што сёння асабліва патрэбныя выхавацелі, якія могуць стаць сапраўднымі спадарожнікамі для моладзі ў іх духоўным росце.

Напрыканцы Францішак падзякаваў манаскім ордэнам за іх служэнне і папрасіў маліцца за яго. Ён таксама нагадаў пра важнасць барацьбы з культурай адкідання ў сучасным грамадстве і заклікаў прымаць і любіць усіх людзей без выключэння.

Сустрэча падкрэсліла важную ролю манаскіх ордэнаў у жыцці Каталіцкага Касцёла і іх місіі ў сучасным свеце, асабліва ў сферы адукацыі і служэння патрабуючым.