Францішак нагадвае пра годнасць зняволеных і заклікае да міру
Аляксандр Амяльчэня - Vatican News
Францішак пачаў з выказвання глыбокага смутку з прычыны забойства Хуана Антоніа Лопеса ў Гандурасе. Лопес быў дэлегатам Божага Слова, каардынатарам сацыяльнай душпастырскай дзейнасці ў дыяцэзіі Трухільё і адным з заснавальнікаў інтэгральнай экалагічнай душпастырскай дзейнасці ў Гандурасе.
Пантыфік выказаў сваю салідарнасць з мясцовым Касцёлам і рашуча асудзіў усе формы насілля. Ён падкрэсліў сваю блізкасць да тых, чые асноўныя правы парушаюцца, і да тых, хто працуе на агульнае дабро, адгукаючыся на крык бедных і зямлі.
Далей Святы Айцец павітаў вернікаў Рыма і пілігрымаў з Італіі і многіх іншых краін. Сярод іх ён асабліва адзначыў эквадорцаў, якія жывуць у Рыме і святкуюць дзень Маці Божай Цыснэ, групу сем'яў і дзяцей са Славакіі, а таксама мексіканскіх вернікаў.
Асаблівую ўвагу Папа надаў удзельнікам маршу, накіраванага на павышэнне дасведчанасці пра становішча зняволеных. Ён падкрэсліў неабходнасць працы над забеспячэннем годных умоў для зняволеных, адзначыўшы, што кожны можа памыліцца, а зняволенне павінна быць шляхам да аднаўлення сумленнага жыцця.
Францішак таксама прывітаў дэлегацыю, якая прыбыла з нагоды Дня хворых на атаксію, і асацыяцыю La Palma з Кастаньёлы-дзі-Маса.
Напрыканцы Пантыфік заклікаў вернікаў працягваць маліцца за мір, адзначыўшы высокую напружанасць на франтах вайны. Ён заклікаў прыслухацца да голасу народаў, якія просяць міру, і не забываць пра пакутуючую Украіну, Палесціну, Ізраіль, М'янму і многія іншыя краіны, якія знаходзяцца ў стане вайны.
Завяршаючы свой зварот, Францішак пажадаў усім добрай нядзелі і папрасіў не забывацца маліцца за яго.
