Францішак наведае Бенілюкс: чаго чакаць ад візіту?
Аляксандр Амяльчэня - Vatican News
Матэа Бруні, кіраўнік Залы Друку Святога Пасада, падчас прэс-канферэнцыі ў Ватыкане падкрэсліў, што гэтыя дзяржавы маюць не толькі гістарычнае, але і вялікае палітычнае значэнне. Паводле яго слоў, у цэнтры папскага візіту будзе разважанне над гісторыяй і роляй, якую Еўропа можа адыграць у свеце ў бліжэйшай будучыні.
Сярод ключавых тэм, якія, верагодна, закране Францішак, Бруні вылучыў пытанне прыёму мігрантаў. Гэтая праблема патрабуе погляду за межы нацыянальных інтарэсаў і салідарнасці паміж рознымі краінамі. Акрамя таго, на першы план выходзіць тэма міру – як пакліканне, якое вырастае з гісторыі Еўропы і знаходзіцца ў яе сэрцы.
Важнай падзеяй, якая паўплывала на рашэнне аб візіце, стала 600-годдзе заснавання ўніверсітэта ў Лёвене. У сувязі з гэтым чакаецца, што Пантыфік падкрэсліць ролю адукацыі, асабліва хрысціянскай, у еўрапейскай культуры. Прэс-сакратар таксама адзначыў, што адной з найбольш актуальных праблем з'яўляецца секулярызацыя, якая кідае выклік хрысціянскаму жыццю і сведчанню ў рэгіёне, дзе хрысціянства становіцца менш вядомым, чым у мінулым.
Не застанецца па-за ўвагай і экалагічная праблематыка. Еўропа сур'ёзна ставіцца да пытанняў аховы навакольнага асяроддзя, і гэтая тэма таксама можа быць уключана ў праграму папскага візіту.
Што датычыцца магчымай сустрэчы Папы з ахвярамі злоўжыванняў з боку духавенства, пра якую паведамляў Касцёл у Бельгіі, Бруні не пацвердзіў гэтую інфармацыю, але і не адмовіў яе. Ён адзначыў, што Францішак усведамляе цяжкасці, драмы і пакуты, звязаныя з гэтай праблемай, і ў яго прамовах можна чакаць спасылак на гэтую тэму.
Такім чынам, візіт Пантыфіка ў Люксембург і Бельгію абяцае стаць важнай падзеяй не толькі для каталіцкай супольнасці, але і для ўсёй Еўропы. Ён дасць магчымасць асэнсаваць ключавыя выклікі, з якімі сутыкаецца кантынент, і абмеркаваць шляхі іх вырашэння ў святле хрысціянскіх каштоўнасцей.
