ПАПА

Францішак сустрэўся з палітыкамі і грамадскасцю Інданезіі

4 верасня 2024 года ў Прэзідэнцкім палацы Істана Негара ў Джакарце адбылася сустрэча Францішка з прадстаўнікамі ўлады, грамадскасці і дыпламатычнага корпуса ў Інданезіі. Яна стала чарговым пунктам апостальскага падарожжа Пантыфіка ў гэтую краіну Паўднёва-Усходняй Азіі.

Аляксандр Амяльчэня - Vatican News

У сваім выступленні Папа падзякаваў прэзідэнту Інданезіі за запрашэнне наведаць краіну і цёплы прыём. Ён таксама павіншаваў новаабранага прэзідэнта і пажадаў яму плённага служэння на карысць краіны і народа.

Пантыфік адзначыў унікальнасць Інданезіі як архіпелага з тысяч астравоў, злучаных морам. Ён правёў паралель паміж акіянам, які аб'ядноўвае ўсе астравы, і ўзаемнай павагай да культурных, этнічных, моўных і рэлігійных асаблівасцяў усіх груп, прысутных у Інданезіі, што з'яўляецца неабходным аб'яднаўчым фактарам для інданезійскага народа.

Францішак падкрэсліў важнасць нацыянальнага дэвіза Інданезіі Bhinneka tunggal ika (Адзінства ў разнастайнасці), які адлюстроўвае шматгранную рэальнасць разнастайных народаў, аб'яднаных у адну нацыю. Ён параўнаў гэтую разнастайнасць з біяразнастайнасцю архіпелага, адзначыўшы, што менавіта адрозненні ствараюць цудоўную мазаіку, дзе кожны элемент з'яўляецца незаменным у стварэнні арыгінальнага і каштоўнага твора.

У сваёй прамове Святы Айцец закрануў тэму гармоніі ў разнастайнасці, падкрэсліўшы, што яна дасягаецца, калі ўлічваюцца агульныя патрэбы ўсіх і калі кожная этнічная група і рэлігійная канфесія дзейнічае ў духу братэрства, імкнучыся да высакароднай мэты служэння агульнаму дабру.

Пантыфік таксама закрануў тэму грамадскага жыцця, заклікаўшы палітыкаў імкнуцца да гармоніі, справядлівасці, павагі да фундаментальных правоў чалавека, устойлівага развіцця, салідарнасці і дасягнення міру як унутры грамадства, так і з іншымі народамі і нацыямі.

Асаблівую ўвагу Пантыфік надаў ролі Каталіцкага Касцёла ў Інданезіі, адзначыўшы яго імкненне да ўзмацнення міжрэлігійнага дыялогу з мэтай ліквідацыі прадузятасці і стварэння клімату ўзаемнай павагі і даверу. Ён падкрэсліў важнасць гэтага дыялогу для вырашэння агульных праблем, у тым ліку барацьбы з экстрэмізмам і нецярпімасцю.

Францішак таксама закрануў тэму сацыяльнай справядлівасці, спаслаўшыся на Прэамбулу Канстытуцыі Інданезіі ад 1945 года. Ён адзначыў, што прынцыпы адзінства ў разнастайнасці і сацыяльнай справядлівасці, а таксама Божае благаслаўленне, згаданыя ў Канстытуцыі, з'яўляюцца фундаментальнымі для інспірацыі і кіраўніцтва грамадскім парадкам у краіне.

У заключэнне свайго выступу Папа выказаў надзею на тое, што кожны ў сваім паўсядзённым жыцці зможа чэрпаць натхненне з гэтых прынцыпаў і ўвасабляць іх падчас выканання сваіх абавязкаў.

Ён падкрэсліў, што гармонія дасягаецца тады, калі мы імкнёмся не толькі да ўласных інтарэсаў і бачання, але і да агульнага дабра, да пабудовы мастоў, садзейнічання згодзе і сінергіі, аб'яднання намаганняў для пераадолення ўсіх форм маральнага, эканамічнага і сацыяльнага бедства і садзейнічання міру і згодзе.

Напрыканцы Францішак благаславіў Інданезію на мір і надзею на будучыню.

Пасля сустрэчы з прадстаўнікамі ўлады, грамадскасці і дыпламатычнага корпуса прэзідэнт Рэспублікі і Папа накіраваліся да галоўнага ўваходу, каб пакінуць будынак. Затым Святы Айцец паехаў у апостальскую нунцыятуру Джакарты, каб сустрэцца з сваімі сабратамі, прадстаўнікамі Таварыства Езуса.