Францішак падчас Імшы ў базіліцы святога Пятра

ПАПА

Літургічны каляндар Папы: надзвычай насычаны кастрычнік

Святы Пасад абнародаваў каляндар урачыстасцей, якія ўзначаліць Францішак у кастрычніку 2024 года. Дакумент, апублікаваны 2 верасня 2024 года, падпісаў арцыбіскуп Дыега Равелі, папскі цырымонімайстар.

Аляксандр Амяльчэня - Vatican News

Каляндар пачынаецца з урачыстай падзеі 2 кастрычніка 2024 года, у літургічны ўспамін святых Анёлаў Ахоўнікаў. У гэты дзень на плошчы святога Пятра ў 9.30 раніцы пройдзе святая Імша на адкрыццё другога этапу Пленарнай асамблеі Сінода Біскупаў. Падзея мае асаблівае значэнне для Каталіцкага Касцёла, бо яна пазначае пачатак важнага перыяду разважанняў і дыскусій сярод духавенства і свецкіх вернікаў з усяго свету.

Праз некалькі тыдняў, 20 кастрычніка 2024 года, у XXIX Звычайную нядзелю, Папа Францішак узначаліць яшчэ адну значную цырымонію. На плошчы святога Пятра ў 10.30 пройдзе святая Імша з кананізацыяй некалькіх благаслаўлёных. Святымі будуць абвешчаны: Мануэль Руіс Лопес і сем яго паплечнікаў з Ордэна Меншых Братоў; Францішак, Муці і Рафаэль Масабкі, свецкія вернікі, забітыя з нянавісці да веры ў сірыйскім Дамаску ў 1860 годзе; Джузэпэ Аламана (1851-1926), італьянскі святар, заснавальнік Інстытута Місіянераў Маці Божай Суцяшэння і Сясцёр Місіянерак Маці Божай Суцяшэння; канадка Мары-Леоні Парадзі (свецкае імя – Віржыні Алодзі) (1840- 1912), заснавальніца Кангрэгацыі Малых Сясцёр Найсвяцейшай Сям'і; італьянка Элена Гуэры (1835-1914), заснавальніца Кангрэгацыі Аблатак Духа Святога.

Падзея стане кульмінацыяй доўгага працэсу прызнання святасці гэтых асоб і будзе мець вялікае значэнне для вернікаў з розных частак свету.

27 кастрычніка 2024 года, у XXX Звычайную нядзелю, у базіліцы святога Пятра ў 10.00 Пантыфік узначаліць святую Імшу, якая завершыць XVI Пленарную асамблею Сінода Біскупаў.

Такім чынам, кастрычнік 2024 года абяцае быць надзвычай насычаным і значным месяцам для Каталіцкага Касцёла.