Пантыфік: за місію Касцёла адказныя ўсе – і святары, і вернікі

Аляксандр Панчанка - Vatican News

“Усе мы, хрысціяне, адказныя за місію Касцёла, кожны святар, кожны чалавек. Мы, святары, не з’яўляемся кіраўнікамі свецкіх, а іх пастырамі”, - сказаў Папа, нагадваючы, што Езус паклікаў і адных і другіх, не каб былі па розныя бакі, а каб дапаўнялі адзін аднаго. “Мы – супольнасць. Вось чаму мы павінны ісці разам, праходзячы па шляху сінадальнасці”, - сцвердзіў Папа.

“Вядома, вы можаце спытаць: а што магу зрабіць я, як кіроўца аўтобуса, як фермер, як рыбак? Тое, што павінны рабіць усе мы: сведчыць сваім жыццём і падзяляць адказнасць за місію Касцёла”, - патлумачыў Святы Айцец.

Францішак падкрэсліў, што свецкія вернікі “знаходзяцца ў Касцёле ва ўласным доме і павінны клапаціцца пра яго”. “Тое ж самае тычыцца і нас, святароў і кансэкраваных асоб. Кожны робіць свой унёсак тым, што ўмее рабіць лепш за ўсё. Мы нясём сумесную адказнасць за місію, мы ўдзельнічаем і жывём у камуніі Касцёла”, - дадаў Папа.

“Молімся аб тым, каб Касцёл працягваў усімі магчымымі спосабамі падтрымліваць сінадальны лад жыцця як знак салідарнай адказнасці, паглыбляючы ўдзел, камунію і супольную місію святароў, манаскіх асобаў і свецкіх вернікаў.”, - агучыў малітоўную інтэнцыю Пантыфік.