Візіт Святога Айца да пажылых і хворых у Сінгапуры
Аляксандр Амяльчэня - Vatican News
Францішка цёпла сустрэлі ў галоўным дворыку Дома. Яго віталі кардынал-арцыбіскуп Сінгапура, выканаўчы дырэктар, генеральны дырэктар і старшыня праўлення Каталіцкай сацыяльнай службы. Акрамя таго, у дворыку сабраліся 100 супрацоўнікаў установы, каб асабіста павітаць высокага госця.
Пасля цёплага прыёму Папа наведаў малітоўны пакой, дзе сустрэўся з арцыбіскупам-эмерытам Сінгапура. Затым Пантыфік накіраваўся ў капліцу Дома, дзе старшыня Каталіцкай сацыяльнай службы прадставіў дзейнасць дабрачыннай арганізацыі.
Важным момантам візіту стала благаслаўленне Папам святароў і пацыентаў установы. Перад тым як пакінуць капліцу, ён таксама асвяціў памятную дошку. Напрыканцы візіту Францішак і супрацоўнікі ўстановы зрабілі супольны здымак ля галоўнага ўваходу ў капліцу.
Візіт падкрэсліў увагу Пантыфіка да патрэб пажылых і хворых людзей, а таксама яго падтрымку дабрачынных арганізацый, якія клапоцяцца пра іх.
