Пантыфік заклікаў Маці Божую развеяць цёмныя хмары зла

Марыя Валодзіна - Vatican News

Малітву ўзначаліў Папа Францішак. Ён заклікаў Панну Марыю звярнуць свой мацярынскі позірк на чалавечую сям'ю, якая “згубіла радасць міру і страціла пачуццё братэрства”.

“Заступіся за наш свет у небяспецы, каб ён захаваў жыццё і адмовіўся ад вайны, клапаціўся пра пакутуючых, бедных, безабаронных, хворых і засмучаных, каб абараняў наш агульны дом”, - маліўся Пантыфік.

“Пачуй наш крык! Нам патрэбны твой ласкавы позірк, які заклікае давяраць твайму Сыну Езусу. Ты, гатовая прыняць нашы пакуты, прыйдзі нам на дапамогу ў гэтыя часы, прыгнечаныя несправядлівасцю і разбуральнымі войнамі, асушы слёзы на пакутуючых тварах тых, хто аплаквае смерць сваіх блізкіх, сваіх дзяцей, абудзі нас ад здранцвення, якое зацьміла наш шлях, і раззброй нашы сэрцы ад зброі гвалту, каб хутчэй спраўдзілася прароцтва Ісаі: “Перакуюць мячы свае на плугі, і дзіды свае на сярпы, не ўздыме народ на народ мяча, і не будуць больш вучыцца ваяваць” (Іс 2, 4), - заклікаў Францішак.

Пантыфік прасіў Марыю Каралеву міру навярнуць душы тых, хто адчувае нянавісць, прымусіць сціхнуць лязгат зброі, якая нясе смерць, спыніць гвалт, які тоіцца ў сэрцы чалавека, і натхніць на справы міру тых, хто кіруе народамі.

Папа заклікаў Маці Божую Ружанцовую развязаць вузлы эгаізму і развеяць цёмныя хмары зла. “Напоўні нас сваёй пяшчотай, падтрымай сваёй клапатлівай рукой і падары нам, тваім дзецям, мацярынскую ласку, якая дазваляе спадзявацца на прыход новага чалавецтва, калі "...пустыня ператворыцца ў сад, і справядлівасць будзе жыць у садзе. Мой народ будзе жыць у мірных паселішчах..." (Іс 32, 15-17).

“Маці Божая Salus Populi Romani, маліся за нас!” - завяршыў малітву Францішак.