Францішак: наказ на дарогу новым кардыналам
Аляксандр Амяльчэня - Vatican News
Францішак тлумачыць, што служэнне кардынала патрабуе расплюшчаных вачэй (occhi alti) – пашыранага погляду і адкрытага сэрца. Гэта дазваляе глядзець далей і любіць больш універсальна, з большай інтэнсіўнасцю. Папа заахвочвае новых кардыналаў увайсці ў школу погляду Хрыста.
Другая якасць – складзеныя рукі (mani giunte) – падкрэслівае важнасць малітвы. Францішак адзначае, што Касцёлу, разам з прапаведаваннем, найбольш патрэбна малітва кардыналаў для добрага кіравання Божым статкам. Малітва з'яўляецца сферай распазнання, дапамагаючы шукаць і знаходзіць волю Божую для народа і рэалізаваць яе.
Трэцяя якасць – босыя ногі (piedi nudi) – сімвалізуе непасрэдны кантакт з рэальнасцю. Папа заклікае кардыналаў дакранацца да жорсткай рэальнасці многіх куткоў свету, ашаломленых болем і пакутамі войнаў, дыскрымінацыі, пераследу, голаду і розных форм беднасці. Гэта патрабуе ад кардыналаў вялікага спачування і міласэрнасці.
У заключнай частцы ліста Францішак дзякуе новым кардыналам за іх шчодрасць і абяцае маліцца за іх. Ён выказвае пажаданне, каб тытул слуга (дыякан) усё больш і больш пераважаў над тытулам эмінэнцыя. Гэтым Пантыфік падкрэслівае, што галоўнае прызначэнне кардыналаў – служэнне Касцёлу і вернікам, а не высокае званне.
Сярод новых пурпуратаў – прадстаўнікі розных краін і кантынентаў, што адлюстроўвае імкненне Францішка да большай разнастайнасці і прадстаўніцтва ў Калегіі кардыналаў. На кансісторыі 7 снежня 2024 года ў Ватыкане ён уручыць кардынальскія берэты як вядомым іерархам, так і менш вядомым з іх, але адданым сваёй місіі ў розных частках свету.
