ПАПА

Святы Айцец: літургічны каляндар на канец 2024 года

Святы Пасад апублікаваў каляндар цэлебрацый, якія ўзначаліць Папа Францішак у лістападзе і снежні 2024 года. Сярод іх – Дзень бедных і кансісторый па ўзвядзенні ў кардынальскую годнасць.

Аляксандр Амяльчэня - Vatican News

Дакумент, падпісаны арцыбіскупам Дыега Равэлі, галоўным папскім цырымоніймайстрам, ахоплівае перыяд з 4 лістапада па 12 снежня 2024 года.

Каляндар пачынаецца з традыцыйнай святой Імшы ў памяць памерлых кардыналаў і біскупаў, якая адбудзецца 4 лістапада ў базіліцы святога Пятра. Гэта штогадовая цэлебрацыя з'яўляецца важным момантам малітвы і ўспаміну для ўсяго Касцёла.

Сярод важных падзей – адзначэнне Сусветнага дня бедных 17 лістапада. Францішак узначаліць святую Імшу, прысвечаную гэтай ініцыятыве, якая стала адным з характэрных элементаў яго пантыфікату.

24 лістапада, ва ўрачыстасць Хрыста Валадара Сусвету, адбудзецца цэлебрацыя Сусветнага дня моладзі на дыяцэзіяльным узроўні. Гэта падзея падкрэслівае пастаянную ўвагу Папы да маладога пакалення і яго ролі ў Касцёле.

Адным з ключавых момантаў календара стане Публічны Звычайны Кансісторый 7 снежня, падчас якога некалькі іерархаў будуць узведзены ў кардынальскую годнасць. Гэта падзея заўсёды прыцягвае вялікую ўвагу, паколькі адлюстроўвае напрамак, у якім Папа вядзе Касцёл.

8 снежня, ва ўрачыстасць Беззаганнага Зачацця Найсвяцейшай Панны Марыі, Папа традыцыйна ўзначаліць святую Імшу з новымі кардыналамі, а потым здзейсніць акт ушанавання Беззаганнай на плошчы Іспаніі ў Рыме.

Завяршае каляндар Эўхарыстыя 12 снежня ў гонар Найсвяцейшай Панны Марыі з Гвадэлупы, якая мае асаблівае значэнне для вернікаў Лацінскай Амерыкі.