Il Messaggero: Папа назваў прыярытэты Юбілею 2025 года
Аляксандр Амяльчэня - Vatican News
Біблейскія карані юбілею сягаюць глыбока ў гісторыю народа Ізраіля. Гэта быў час глыбокіх грамадскіх і духоўных перамен, калі зямля заставалася неапрацаванай як напамін пра тое, што яна належыць толькі Богу, даўгі дараваліся, а нявольнікі атрымлівалі свабоду.
Юбілей – гэта магчымасць для кожнага пачаць жыццё нанова
Францішак падкрэслівае, што Езус надаў Юбілею новае вымярэнне. У назарэцкай сінагозе Ён абвясціў сябе выканаўцам старазапаветных прароцтваў пра вызваленне і збаўленне. Хрыстус прыйшоў, каб вызваліць ад усялякага рабства, адкрыць вочы сляпым і вызваліць прыгнечаных.
Святая Брама – гэта сімвал пераходу да новага жыцця
З часоў першага касцельнага Юбілею 1300 года, абвешчанага Папам Баніфацыем VIII, Рым стаў цэнтрам пілігрымавання для мільёнаў вернікаў. Іх знешняе падарожжа адлюстроўвае ўнутранае імкненне да духоўнага абнаўлення. Святы Айцец нагадвае, што хрысціянскае жыццё – гэта шлях, які патрабуе асаблівых момантаў для ўмацавання надзеі.
Рым павінен стаць прыкладам братэрства і дыялогу паміж культурамі
Для Юбілейнага 2025 года Вечны горад рыхтуецца не толькі знешне – праз паляпшэнне інфраструктуры і рэстаўрацыю помнікаў. Папа бачыць у гэтым асаблівае пакліканне Рыма – быць прасторай гасціннасці і сустрэчы розных культур, месцам дыялогу і ўзаемаразумення.
Святы Айцец заклікае ўбачыць у Юбілеі не проста гістарычную традыцыю, а жывы досвед сустрэчы з Хрыстом. Праз адкрыццё Святой Брамы ў ноч Божага Нараджэння пачнецца год асаблівай ласкі, калі кожны вернік зможа нанова адкрыць радасць сустрэчы з Богам і бліжнім.
Хрысціянскае жыццё - гэта шлях, які мае патрэбу ў яркіх момантах для ўмацавання надзеі
Папа Францішак падкрэслівае, што Юбілей 2025 года павінен стаць не толькі часам асабістага духоўнага абнаўлення, але і нагодай для ўмацавання супольнасці вернікаў. Ён заклікае ўсіх хрысціян адкрыць свае сэрцы для прыняцця Божай ласкі і стаць сведкамі Божай міласэрнасці ў сучасным свеце.
