Францішак наведаў батлейку на ватыканскай плошчы
Аляксандр Амяльчэня - Vatican News
Па дарозе да батлейкі, што размешчана побач з велічнай каляднай ёлкай, Папа вітаў і благаслаўляў людзей, размаўляў з некаторымі з іх і раздаваў ружанцы дзецям. Святы Айцец таксама паслухаў калядку Ціхая ноч у выкананні аркестра Швейцарскай гвардыі.
Сёлетняя батлейка ў Ватыкане адлюстроўвае прыгажосць марскога курорта Града ў Італіі і яго традыцыйную архітэктуру, у прыватнасці казонэ – характэрны для гэтай часткі Гарыцыі будынак з чароту.
29-метровая ёлка з мясцовасці Ледра ў Трыдэнцкай дыяцэзіі была абрана не толькі з эстэтычных меркаванняў. Яе высечка была часткай натуральнага абнаўлення лясного масіву, паколькі дрэва паходзіць з тэрыторый, прызначаных для высечкі дзеля забеспячэння правільнага лесагаспадарання.
Батлейка і ёлка будуць упрыгожваць Плошчу Святога Пятра да Нядзелі Хросту Пана, 12 студзеня 2025 года.
