Францішак заклікаў пераўтварыць юбілейнае дараванне ў сацыяльнае
Аляксандр Амяльчэня - Vatican News
Традыцыйны зварот пасля малітвы Анёл Панскі Папа пачаў з віншаванняў рымлянам і пілігрымам, а таксама ўсім, хто сочыць за трансляцыяй праз СМІ.
Юбілей патрабуе сацыяльнага даравання
"Сёлетні Сусветны дзень міру, устаноўлены святым Паўлам VI, мае асаблівую тэму ў сувязі з Юбілеем – дараванне даўгоў", - нагадаў Пантыфік. Ён заўважыў, што першым, хто даруе даўгі, з'яўляецца Бог, як мы просім у малітве Ойча наш. "Юбілей патрабуе пераўтварыць гэтае дараванне ў сацыяльным вымярэнні, каб ніводны чалавек, ніводная сям'я, ніводны народ не былі прыгнечаны даўгамі", - дадаў Святы Айцец.
Дыялог і перамовы – шлях да міру
Папа выказаў удзячнасць усім, хто спрыяе міру праз малітву і дзеянні, у тым ліку ўдзельнікам нацыянальнага Маршу міру ў Пезара і акцыі Мір на ўсіх землях, арганізаванай Супольнасцю Святога Эгідзія ў розных краінах. Асаблівую падзяку ён выказаў тым, хто працуе на карысць дыялогу і перамоў у зонах канфліктаў.
Вайна – заўсёды паражэнне
Згадваючы Украіну, Газу, Ізраіль, М'янму, Ківу і іншыя народы, якія пакутуюць ад войнаў, Францішак звярнуўся: "Браты і сёстры, вайна разбурае, заўсёды разбурае! Вайна заўсёды з'яўляецца паражэннем, заўсёды".
Завяршаючы свой зварот, Папа павітаў музычныя калектывы са Злучаных Штатаў, вернікаў з іспанскага горада Пантэведра, валанцёраў Fraterna Domus і моладзь з Групы Беззаганнай. Ён пажадаў усім добрага пачатку года пад апекай Пана і Дзевы Марыі, просячы не забывацца маліцца за яго.
