Сардэчна вітаем, Святы Айцец!

Праз 38 дзён пасля шпіталізацыі Папа Францішак пакінуў клініку "Джэмэлі".

Тэкст: Андрэа Тарніелі / Пераклад і адаптацыя: Марыя Валодзіна - Vatican News

Прайшло 38 дзён з 14 лютага, калі Папа Францішак трапіў у шпіталь. Гэтыя тыдні былі няпростымі: 88-гадовы Пантыфік перанёс двухбаковую пнеўманію, і медыцынскія бюлетэні не замоўчвалі складанасці клінічнай карціны. Увесь гэты час за яго здароўе ўзносілі малітвы – не толькі католікі, не толькі хрысціяне. За Папу маліліся людзі, якія належаць да іншых рэлігійных канфесій. Свае добрыя пажаданні і словы падтрымкі дасылалі яму многія людзі, якія не вераць.

Сённяшняе кароткае прывітанне было доўгачаканым. У гэтыя доўгія дні пакут асабліва кранальным быў момант, калі 6 сакавіка Францішак слабым голасам выказаў удзячнасць усім, хто маліўся за яго на Плошчы Святога Пятра і па ўсім свеце. Яшчэ адным момантам суцяшэння стала яго з’яўленне 16 сакавіка, калі ён маліўся ў капліцы на дзясятым паверсе шпіталя, хоць мы і бачылі яго толькі са спіны.

Сёння, пасля доўгіх дзён трывогі, але і вялікага даверу да Бога, мы зноў убачылі Папу Францішка. Ён вярнуўся дадому, у Ватыкан, і зноў удзяліў нам сваё благаслаўленне. З шпітальнай палаты ён нагадваў нам, што жыццё варта таго, каб пражыць кожны яго момант. Ён нагадаў нам, што пакуты і слабасць могуць стаць падставай для евангельскага сведчання аб муках Хрыста.

Мы ўдзячныя яму за словы пра мір, якія прагучалі з бальнічнай палаты. Пантыфік сказаў, што адтуль вайна здаецца яму яшчэ больш абсурднай. Ён заклікаў нас раззброіць Зямлю, адмовіцца ад гонкі ўзбраенняў, якія нясуць толькі смерць, ахвяраваў свае пакуты за мір, якому сёння так пагражаюць.

Сардэчна вітаем дома, Святы Айцец!