ЗША фінансуе дзве глабальныя праграмы па абароне свабоды рэлігіі
У сталіцы Злучаных Штатаў праходзіла пасяджэнне міністраў замежных спраў многіх краін, прысвечанае пашырэнню свабоды рэлігіі.
Гэта быў першы такога роду саміт, арганізаваны Дзяржаўным дэпартаментам ЗША ў мэтах пошуку метадаў абароны свабоды рэлігіі. У ім узялі ўдзел больш за дзве сотні прадстаўнікоў урадаў, рэлігій, арганізацый, якія ўдзельнічаюць у абароне свабоды веравызнання, прадстаўнікі рэлігійных меншасцей, якія падвяргаюцца пераследу.
Майк Пэнс заявіў, што яго ўрад выдаткуе 110 мільёнаў долараў на фінансаванне праграмы “Генацыд і адказ”, накіраванай на дапамогу ахвярам рэлігійнага пераследу, у прыватнасці, на Блізкім Усходзе, дзе “людзі праз гэтую дапамогу атрымаюць магчымасць вярнуцца да сваіх каранёў і дапамагчы адраджэнню сваіх зямель”. Паводле амерыканскага палітыка, 17 мільёнаў долараў з гэтага фонду атрымае Ірак, які быў галоўная тэмай цяперашняй сесіі. Таксама ўдзельнікі выслухалі сведчанні прадстаўнікоў езідаў.
У сваю чаргу, “Новы фонд міжнароднай свабоды” будзе спрыяць рэалізацыі мерапрыемстваў і ініцыятыў, накіраваных на садзейнічанне развіццю рэлігійнай свабоды. Пэнс заклікаў прадстаўнікоў урадаў далучыцца да фінансавання гэтай праграмы, каб яна атрымала больш шырокі ахоп і ўключыла як мага большую колькасць краін.
Дзяржсакратар ЗША Майк Пампеа сказаў, што, улічваючы поспех сёлетняга форуму, падобная сустрэча адбудзецца і ў наступным годзе.
З 24 ліпеня 2018 г. у сталіцы Злучаных Штатаў з ініцыятывы гэтай краіны праходзіла міжнародная сустрэча па пытаннях свабоды веравызнання. У ёй узялі ўдзел дэлегацыі з 80 краін свету, у тым ліку 40 міністраў замежных спраў.
