Гусман Карыкіры Лекур падчас уручэння даверчых грамат Францішку

СВЕТ

Папа пацвердзіў свой намер здзейсніць візіт ва Уругвай

Магчымасць Апостальскага візіту Францішка ва Уругвай па-ранейшаму застаецца ў парадку дня. Папа пацвердзіў гэта падчас прыняцця даверчых грамат новага пасла Уругвая пры Святым Пасадзе Гусмана Карыкіры Лекура.

Пра кароткую размову са Святым Айцом, якая адбылася 9 студзеня 2021 г., новапрызначаны дыпламат расказаў у інтэрв’ю Catholic News Service. Па словах Карыкіры, Францішак запэўніў яго ў сваім жаданні і намеры наведаць Рыа-дэ-ла-Плата – у прыватнасці, Уругвай і родную Аргентыну.

Папа прызнаўся, што першапачаткова планаваў здзейсніць візіт у шэраг краін Паўднёвай Амерыкі ў кастрычніку 2017 г., аднак тады аб пераносе падарожжа на больш позні час папрасіў чылійскі бок у сувязі з тым, што ў краіне набліжаліся прэзідэнцкія выбары.

Францішак патлумачыў Гусману Карыкіры, што “цяпер вымушаны чакаць заканчэння пандэміі і ў цэлым спрыяльных умоў”, каб, “калі дазволіць Божы Провід”, ажыццявіць паездку.

Карыкіры добра знаёмы з спецыфікай Святога Пасаду, паколькі доўгія гады быў яго супрацоўнікам. Яшчэ ў 1974 г. Павел VI прызначыў яго членам Папскай рады па справах свецкіх, а ў 1977 г. кіраўніком аднаго з яе аддзелаў. Падчас пантыфікату св. Яна Паўла ІІ уругваец стаў падсакратаром гэтай дыкастэрыі. А ў 2011 г., падчас пантыфікату Бэнэдыкту XVI, – сакратаром Папскай камісіі па справах Лацінскай Амерыкі – структуры, якая разам з Кангрэгацыяй па справах біскупаў каардынуе ўзаемадзеянне Апостальскай Сталіцы з Касцёлам у рэгіёне.

Францішак, які цесна супрацоўнічаў з Карыкіры яшчэ падчас свайго служэння ў Буэнас-Айрэсе, у 2014 г. прызначыў яго віцэ-старшынёй вышэйузгаданай Камісіі. Ён стаў першым у гісторыі свецкім, які заняў гэту высокую пасаду ў Рымскай курыі.