ЗША: біскупы супраць фінансавання абортаў з падаткаў

Біскупы падкрэслілі, што амерыканскім сем’ям у час пандэміі патрэбна канкрэтная падтрымка, але нельга з гэтай нагоды дазваляць дзеянні, накіраваныя супраць жыцця чалавека.

Выратавальны план эканомікі ЗША быў прыняты 6 сакавіка 2021 г. Напярэдадні амерыканскія біскупы выдалі заяву, у якой называюць яго “крокам у добрым кірунку, калі гаворка ідзе пра канкрэтную дапамогу сем’ям, пацярпелым з прычыны пандэміі”.

У той жа час старшыня Канферэнцыі Каталіцкіх Біскупаў ЗША, арцыбіскуп Хасэ Гомэс заўважыў, што гэты план можа прывесці да парушэння доўгатрывалага двухпартыйнага кампрамісу, які бярэ пад увагу сумленні мільёнаў амерыканцаў.

Біскупы спасылаюцца на адсутнасць у новым законе так званай папраўкі Хайда ад 1980 г., паводле якой забаранялася непасрэднае фінансаванне абортаў з федэральных падаткаў, за выключэннем цяжарнасці ў выпадку насілля, кровазмяшэння або калі жыццё жанчыны пад пагрозай. Іерархі выказваюць непакой, што цяпер даступны фонд будзе шырэй выкарыстоўвацца на субсідзіраванне абортаў.

Амерыканскі епіскапат адначасова нагадвае, што на працягу апошніх 45 гадоў Кангрэс ЗША – і пры дэмакратах, і пры рэспубліканцах – сцвярджаў, што падаткаплацельшчыкі не павінны прымушацца насуперак уласнаму сумленню да фінансавання абортаў.

Арцыбіскуп Гомэс заклікаў Прэзідэнта Джо Байдэна не навязваць амерыканцам гэтага няпростага маральнага рашэння адносна лёсу жыцця ненароджаных.