Святы Айцец моліцца за ахвяр аўтобуснай аварыі ў Балгарыі
Аляксандр Панчанка – Vatican News
“Глыбока засмучаны паведамленнем пра гібель і траўміраванне людзей у выніку смяротнай аўтобуснай аварыі ў Балгарыі, папа Францішак выказвае шчырую салідарнасць усім, хто пацярпеў падчас гэтай трагедыі”, - гаворыцца ў тэлеграме, якую кардынал Дзяржсакратар П’етра Паралін даслаў ад імя Святога Айца Прэзідэнту Паўночнай Македоніі Стэва Пендароўскаму.
Узгадваючы асаблівым чынам загінулых дзяцей Пантыфік даверыў душы памерлых міласэрнасці Усявышняга і запэўніў сем’і ахвяр і параненых у сваёй малітве.
Трагедыя адбылася ў ноч з 22 па 23 лістапада 2021 г. Аўтобус з каля 50-цю пасажырамі на борце ехаў з Турцыі ў Паўночную Македонію. На небяспечным участку аўтамагістралі ў 40 км на поўдзень ад Сафіі па невядомых прычынах ён урэзаўся ў агароджу і перакуліўся. Паведамляецца, што ахвяр здарэння было шмат, бо ў аўтобусе выбухнуў пажар. Большасць загінулых – грамадзяне Паўночнай Македоніі, але ёсць таксама грамадзянін Сербіі і грамадзянін Бельгіі.
