Італія: Касцёл імкнецца выправіць шкоду, нанесеную Вівальдзі

Аляксандр Амяльчэня - Vatican News

Касцёл у 1739 годзе забараніў прэм’еру музычнага твору ў гэтым горадзе. Падзея паклала пачатак заняпаду творчасці Вівальдзі.

Арцыбіскуп Джанкарла Пэрэга прысутнічаў не толькі на прэм’еры 30 снежня 2021 года ў Муніцыпальным тэатры ў Ферары, але таксама прыняў удзел у сустрэчы пад назвай Ferrara proibita (Забароненая Ферара), якая папярэднічала ёй.

Сусветная прэм'ера оперы Il Farnace, галоўным героем якой з'яўляецца кароль Фарнак, адбылася ў 1727 годзе ў Венецыі. Затым яна была пастаўлена ў Ліворна, Празе, Мантуі і Трэвіза. Моцную апазіцыю прэм'еры твора ў Ферары падчас карнавалу ў 1739 годзе выказаў тагачасны мясцовы арцыбіскуп Тамаза Руфа. Яго матывавала тое, што Вівальдзі, хоць і быў святаром, не цэлебраваў Імшы і з'яўляўся ў кампаніі спявачкі Ганны Джыро і іншых жанчын. Сваю ролю таксама адыграла негатыўнае стаўленне іерарха да прысутнасці духоўных асоб у свеце тэатра. З прычыны таго, што прэм'ера ў Ферары не адбылася, Вівальдзі, які таксама быў імпрэсарыа, панёс сур'ёзныя фінансавыя страты і з'ехаў з Італіі.

Творчасць Вівальдзі адышла ў нябыт да ХІХ стагоддзя, калі былі адкрыты яго інструментальныя кампазіцыі. Сцэнічныя творы геніяльнага кампазітара былі знойдзены ў архівах толькі ў ХХ стагоддзі. Захавалася 21 з 42 опер, якія прыпісваюцца яму.