Канада: лагатып візіту Папы стварыў прадстаўнік карэнных народаў

Афіцыйны сімвал падарожжа Папы ў Канаду, якое пройдзе 24-30 ліпеня 2022 года, распрацаваў 45-гадовы Шон Вінсэн, графік-дызайнер з метыскай супольнасці правінцыі Манітоба.

Аляксандр Панчанка - Vatican News

Лагатып адлюстроўвае дэвіз пілігрымкі: “Ісці разам” (Walking Together). Мастак стварыў яго ў форме сіняга кола, якое сімвалізуе рух, унутры якога змешчаны знак метысаў, стылізаваныя выявы арла, рыб, паўночных аленяў, канадскіх раслін і стыхіяў прыроды, а ў верхняй частцы – голуб, як сімвал Святога Духа, і ключы святога Пятра.

Шон Вінсэн патлумачыў, што галоўным чынам імкнуўся паказаць супольнасць. “Куды б мы ні пайшлі на гэтым шляху аздараўлення і прымірэння, мы ідзем разам”, - сказаў ён, дадаючы, што, калі ствараў лагатып натхняўся прыродай сваёй роднай зямлі, сваімі каранямі і традыцыямі, думкамі пра сям’ю, сяброў, продкаў.

Мастак прызнаўся, што атрымаўшы прапанову распрацаваць сімвал гістарычнага візіту Пантыфіка ў Канаду, спачатку вагаўся, адчуваючы вялікую адказнасць, але потым, параіўшыся са старэйшынамі сваёй супольнасці і сям’ёй, пагадзіўся прыняць удзел у гэтай місіі. Вінсэн займаецца графічным дызайнам з 2007 года і ўжо стварыў шмат лагатыпаў для розных арганізацый і структур абарыгенаў.