Свет

Афганістан: у сталіцы не засталося католікаў

З прыйсцем да ўлады талібаў Афганістан быў зруйнаваны. У сталіцы краіны не засталося католікаў. Манаскія супольнасці, якія дапамагалі непаўнаспраўным, былі змушаны завяршыць тут сваю дзейнасць.

Ян Глінскі - Vatican News

Афганцы прабываюць у разгубленасці, яны засталіся без дапамогі, пануе жахлівы гаспадарчы і гуманітарны крызіс. Так апісвае сітуацыю ксёндз Матэо Санавіо, які ў Кабуле ўзначальваў цэнтр для непаўнаспраўных дзяцей. Арганізацыя дзейнічала на працягу 15 гадоў, але была зачынена. Такі ж лёс напаткаў таксама асяродкі, заснаваныя іншымі манаскімі супольнасцямі.

Таварыства “Для дзяцей Кабула” аб’ядноўвала ў супольных дзеяннях сем мужчынскіх і сем жаночых манаскіх супольнасцяў. Улады цярпелі іх нябачную прысутнасць. Аднак цяпер усе падапечныя мусілі вярнуцца ў свае сем’і. Ксёндз Санавіо зараз каардынуе іх транспарціроўку ў Італію праз гуманітарныя калідоры ў супрацоўніцтве з Супольнасцю святога Эгідзія, дабрачыннага таварыства Caritas і італьянскім урадам.

Як адзначыў святар, ніводны католік не застаўся ў Кабуле, бо іначай яму пагражала б смерць ад рук талібаў. “Ад злашчаснага 15 жніўня 2021 г. прыярытэтам было ўратаваць усіх, хто працаваў для цэнтра, бо інакш іх абвінавацілі б у супрацоўніцтве з Захадам”, – адзначыў ксёндз Санавіо.

Па словах святара, яшчэ не ўсе ў бяспецы, некаторыя сем’і застаюцца ў Кабуле. Дзесяць чалавек загінулі. “Пасля закрыцця цэнтра мы канцэнтруемся на падтрымцы сем’яў, якія прыбылі ў Італію, каб яны маглі інтэгравацца”, – дадаў святар.

Многія сем’і былі вымушаны міграваць у Пакістан і Іран. Звыш сямі тысяч афганцаў склалі заявы на пераезд у Італію або на ўз’яднанне з сем’ямі ў іншых краінах. Найбольш жахлівае становішча дзяцей. 12,9 мільёна з іх патрабуе гуманітарнай дапамогі, ім пагражае смерць ад голаду. 28 % дзяўчат аддаюць замуж ва ўзросце да 18 гадоў, а ў 13 % сем’яў прынамсі адно дзіця ва ўзросце ад 6 да 17 гадоў працуе ў складаных умовах.

Ксёндз Санавіо вельмі сурова ацэньвае дзеянні Захаду ў справе Афганістана. “Гэтая краіна пабудавана на опіуме. Яна ляжыць на скрыжаванні гандлю наркотыкамі і зброяй у Азіі. Талібы робяць на гэтым сваю справу. Амерыканцы і Захад нясуць адказнасць за падман гэтых людзей, якіх запэўніваюць, што іншай будучыні быць не можа. Недаацанілі ўплыву талібаў, або, што яшчэ горш, прадбачылі іх вяртанне і дзеля эканамічных або геапалітычных пытанняў пагадзіліся заплаціць гэтую цану”, – падзяліўся святар.

“На жаль, калі логіка эканомікі і грошай бярэ верх, чалавецтва адыходзіць на другі план і застаецца толькі разбурэнне. Гэта параза чалавецтва”, – заключыў ксёндз Матэо Санавіо.