Дзеці з сектара Газа даслалі Францішку відэа

Аляксандр Амяльчэня - Vatican News

Палесцінскія дзеці “моляцца за Папу і, нягледзячы на тое, што жывуць пад бомбамі, працягваюць дэманстраваць (...) аблічча хрысціянскай надзеі”, - сказаў айцец Франчэска Патон, кустод Святой Зямлі.

Францішканін паведаміў, што апошнія навіны з каталіцкай парафіі ў Газе сумныя. Каля касцёла прагрымеў выбух; пацярпеў таксама будынак школы Сясцёр ружанцовых. Ён адзначыў, што, акрамя дзяцей з сектара Газа, за мір моляцца таксама дзеці з Ізраіля. 4 лістапада 2023 года ў Іерусаліме адбылося набажэнства, дзе малодшыя парафіяне, акрамя малітвы, давалі сведчанні.

“Дзеці баяцца, што вайна закране і іх сем’і. А гэта тое, што накладвае адбітак не толькі на дзяцінства, але і на ўсё наступнае жыццё”, - заўважыў айцец Патон. Як дадаў манах, дзеці “валодаюць здольнасцю да суперажывання, верагодна, большай, чым дарослыя”, “яны здольныя ўсвядоміць, што пакуты закранаюць усіх".

Кустод Святой Зямлі патлумачыў, што цяперашняя атмасфера вельмі цяжкая, “амаль сюррэалістычная”. Усюды пануюць страх і пачуццё гневу, нянавісці і бездапаможнасці, і “ўсё гэта яшчэ больш падкрэслівае неабходнасць малітвы”.

“Мы павінны заклікаць тых, хто мае ўладу, хто трымае карты ў сваіх руках, зрабіць нешта для мірных рашэнняў і, перш за ўсё, гарантаваць абарону мірнага насельніцтва, асабліва дзяцей”, - сказаў францішканін.

Манах нагадаў, што цяперашні крызіс пачаўся з жахлівай расправы над ізраільскім мірным насельніцтвам каля сектара Газа, 250 чалавек былі выкрадзены. “Але цяпер на другім баку мы маем ужо каля 10 тысяч загінулых, і амаль палова з іх – дзеці. Гэта драма, трагедыя, якая павінна ўзрушыць сумленне кожнага з нас, а таксама павінна закрануць сумленне моцных гэтага свету”, - падкрэсліў айцец Патон.