Міжрэлігійная пілігрымка міру на карэйскай мяжы
Аляксандр Амяльчэня - Vatican News
У малітоўнай ініцыятыве, якую рэалізавалі з 29 лютага па 21 сакавіка 2024 года, бяруць удзел католікі, пратэстанты, будысты і прадстаўнікі новага будысцкага руху Вон.
Мірная пілігрымка была здзейснена ў кантэксце росту напружанасці паміж дзвюма Карэямі. “Мір – гэта фундаментальная каштоўнасць, якая адносіцца да ўсіх рэлігій, і ніколі не можа быць дасягнута фізічнай сілай. Мы прызнаём адрозненні, прымаем іх і рухаемся разам, гледзячы ў адным кірунку”, - падкрэслілі арганізатары.
Некаторыя ўдзельнікі прайшлі 400 кіламетраў, каб дабрацца да ваеннай дэмілітарызаванай зоны, паласы зямлі, якая з 1953 года служыць буферам паміж дзвюма Карэямі.
Пілігрымы наведалі, між іншым, Звон міру ў Паджу. Ад імя Каталіцкага Касцёла там выступіў ксёндз Цімаці Лі Ын Хён з дыяцэзіі Уіджонбу. Ён нагадаў старую карэйскую прымаўку: шлях у тысячу міль заўсёды пачынаецца з першага кроку. “Гэта крок, які мы хочам зрабіць. Я лічу, што гэта добрая ініцыятыва для пабудовы міру. Заклікаем усіх далучыцца да нас на шляху міру і збаўлення”, - звярнуўся каталіцкі святар.
