Экуменічная дэлегацыя падтрымала пашырэнне ЕС на Усходнюю Еўропу
Аляксандр Амяльчэня - Vatican News
Яна сустрэлася 24 чэрвеня 2024 года з віцэ-прэм'ерам Венгрыі Жолтам Шэм'енам. Размова стала магчымасцю прадставіць уклад Цэркваў у асноўныя палітычныя прыярытэты венгерскага старшынства ў Радзе ЕС, якое пачнецца 1 ліпеня 2024 года.
Прадстаўнікі хрысціян падкрэслілі неабходнасць вяртання да асноватворных каштоўнасцей Еўрапейскага саюза, з асаблівым акцэнтам на адзінстве і салідарнасці ў якасці кіруючых прынцыпаў будучага стратэгічнага парадку дня Супольнасці. Дэлегацыя выказала заклапочанасць ростам сацыяльнай і палітычнай палярызацыі ў краінах-членах ЕС, а таксама тэндэнцыямі злоўжывання і інструменталізацыі рэлігіі. Была падкрэслена неабходнасць усталявання міру і стабільнасці на еўрапейскім кантыненце і за яго межамі.
Падчас сустрэчы прадстаўнікі COMECE і KEK заклікалі Венгрыю падтрымаць арыентаваны на грамадзян, варты даверу і справядлівы працэс пашырэння ЕС з уключэннем у яго краін Заходніх Балкан і Усходняй Еўропы.
Экуменічная дэлегацыя выказала надзею на тое, што дыялог паміж ЕС і Цэрквамі падчас старшынства Венгрыі будзе ўзмоцнены.
COMECE і KEK разам прадстаўляюць каля 380 мільёнаў грамадзян краін-членаў ЕС. Яны цвёрда адданыя суправаджэнню і падтрымцы працэсу еўрапейскай інтэграцыі, заснаванага на хрысціянскіх каштоўнасцях, такіх як чалавечая годнасць, павага, справядлівасць, мір і цэласнасць стварэння.
Сустрэчы з краінамі-старшынямі ЕС з'яўляюцца часткай даўняй традыцыі, якая падтрымліваецца артыкулам 17 Дамовы аб функцыянаванні Еўрапейскага саюза, дзе прадугледжаны адкрыты, празрысты і рэгулярны дыялог паміж ЕС і Цэрквамі, асацыяцыямі і рэлігійнымі суполкамі.
