Кіеў: кардынал Паралін сустрэўся з прэм'ерам і спікерам парламента
Аляксандр Амяльчэня - Vatican News
“Візіт кардынала П’етра Параліна ва Украіну і наведванне ўкраінскіх гарадоў падчас вайны, развязанай Расіяй, сведчаць аб высокай цікавасці да нашай краіны”, - напісаў Дзяніс Шмыгаль на сваім сайце. Ён падзякаваў Святому Пасаду за ўдзел у Першым саміце міру ў Швейцарыі і падтрымку яго рашэння.
Прэм'ер-міністр таксама падкрэсліў, што Украіна высока цэніць гуманітарную дапамогу і актыўны ўдзел з боку Святога Пасада ў працэсе вяртання дэпартаваных украінскіх дзяцей і палонных. Шмыгаль таксама падзякаваў за дапамогу ў лячэнні ўкраінскіх падлеткаў, якія сталі ахвярамі расійскай агрэсіі. “Мы таксама разлічваем на ўдзел і дапамогу Апостальскай Сталіцы ў аднаўленні медыцынскай інфраструктуры Украіны”, - дадаў ён.
Пасланнік Папы Францішка знаходзіцца ва Украіне з афіцыйным візітам 19-24 ліпеня 2024 года.
У размовах кардынала Параліна з старшынёй Вярхоўнай Рады Украіны Русланам Стэфанчуком дамінавалі гуманітарныя пытанні. Пра ход сустрэчы, якая прайшла 22 ліпеня 2024 года, паведамляе афіцыйны сайт украінскага парламента.
На пачатку ўкраінскі палітык выказаў удзячнасць Папу Францішку і Святому Пасаду за пастаянную падтрымку Украіны. “Я асабліва ўдзячны за гуманітарную дапамогу, аказаную ў рамках місіі спецыяльнага прадстаўніка Папы, кардынала Конрада Краеўскага”, - прызнаўся ён.
Звяртаючыся да Дзяржсакратара, старшыня Вярхоўнай Рады сказаў: “Я ведаю, што Ваша Эмінэнцыя былі ў Адэсе і на свае вочы бачылі наступствы расійскіх ракетных удараў па горадзе. Таму мы чакаем далейшай падтрымкі і гуманітарнай дапамогі, у першую чаргу ад каталіцкіх арганізацый”. Ён таксама падзякаваў іерарху за яго асабісты ўдзел у Саміце міру, які прайшоў нядаўна ў Швейцарыі.
Падчас сустрэчы бакі абмеркавалі важнасць рэалізацыі формулы міру прэзідэнта Уладзіміра Зяленскага. Вялікая ўвага надавалася вяртанню дэпартаваных украінскіх дзяцей і ваеннапалонных.
Гаворачы аб умовах утрымання ваеннапалонных, Руслан Стэфанчук падкрэсліў, што Украіна стварыла і забяспечвае годныя ўмовы для расійскіх ваеннапалонных, у адрозненне ад другога боку. “Расія не згодная на стварэнне сумеснай медыцынскай камісіі для аб'ектыўнага вызначэння стану здароўя ўкраінскіх ваеннапалонных”, - сказаў старшыня Вярхоўнай Рады. Ён заклікаў Святы Пасад прыкласці ўсе намаганні для змены пазіцыі Расіі па стварэнні адпаведнай медыцынскай камісіі.
Руслан Стэфанчук таксама падзякаваў Святому Пасаду за дапамогу ўкраінскім дзецям падчас вайны і арганізацыю летняга адпачынку для іх у Італіі.
Старшыня ўкраінскага парламента таксама вітаў далучэнне Святога Пасада ў якасці назіральніка да Міжнароднай кааліцыі за вяртанне ўкраінскіх дзяцей.
