Пераслед хрысціян у 2023 годзе ўзмацніўся – Open Doors
Аляксандр Амяльчэня - Vatican News
Нагодай для ацэнкі сусветнага стану рэлігійнай свабоды стаў штогадовы Міжнародны дзень памяці ахвяр актаў насілля на аснове рэлігіі ці перакананняў, які адзначаецца 22 жніўня.
Паводле Сусветнага індэкса пераследу Open Doors, за апошняе дзесяцігоддзе атакі на хрысціян узмацніліся, але распаўсюджваліся менш хутка. Індэкс 2024 года сведчыць аб змене сітуацыі – тэмп росту пераследу ў параўнанні з папярэднім годам падвоіўся.
Трывожная тэндэнцыя праяўляецца асабліва ў рэкорднай колькасці зачыненых або знішчаных за год храмаў – у сем разоў больш, чым у папярэднім годзе – 14 766. Таксама "ўзровень насілля" ва ўсіх 50 вядучых краінах Сусветнага індэкса пераследу павысіўся на 7,7 працэнта.
Існуе рэкордная колькасць краін, дзе хрысціяне падвяргаюцца высокаму або вельмі высокаму ўзроўню пераследу: Open Doors назвала 78 краін – раней 76, у 13 краінах назіраецца экстрэмальны пераслед – раней іх было 11.
Гэты "выбух насілля" выяўляецца ў рэзкім павелічэнні колькасці хрысціян, якія былі атакаваны фізічна або якім пагражалі смерцю: паводле НДА, гэта каля 43 тысяч у параўнанні з менш чым 30 тысячамі ў папярэднім годзе. Таксама вырасла колькасць атакаваных хрысціянскіх будынкаў і колькасць хрысціян, вымушаных пакінуць свае дамы (больш за 295 тысяч асоб у параўнанні з 139 тысячамі ў папярэднім годзе).
Больш за 365 мільёнаў хрысціян – кожны сёмы вернік у свеце – зараз перажываюць моцны пераслед і дыскрымінацыю ў 78 краінах.
У 2023 годзе амаль 5 тысяч хрысціян ва ўсім свеце былі забіты толькі таму, што яны хрысціяне, паведамляе Open Doors. Найгоршая сітуацыя ў самай населенай краіне Афрыкі: ў Нігерыі былі забіты 4 118 хрысціян.
Курт Іглер, выканаўчы дырэктар Open Doors Аўстрыя, назваў рэлігійную свабоду "індыкатарам стану здароўя краіны": калі гэта свабода ў дзяржаве парушаецца, гэта часта прыводзіць да таго, што іншыя індывідуальныя або калектыўныя свабоды таксама ставяцца пад пытанне.
Open Doors заклікала адказных асоб у палітыцы і дзяржаўнай адміністрацыі актыўна і бескампрамісна выступаць супраць насілля ў дачыненні да хрысціян і іншых рэлігійных меншасцей.
