СВЕТ

Турынская Плашчаніца: сляды крыві адпавядаюць апісанню Евангелля

Апошнія даследаванні італьянскіх навукоўцаў пацвярджаюць гіпотэзу, што Турынская Плашчаніца з'яўляецца 2000-гадовай рэліквіяй, а не як раней сцвярджалася, палатном з часоў сярэднявечча.

Аляксандр Амяльчэня - Vatican News

Гэта адкрыццё належыць прафесару Джуліа Фанці з Універсітэта Падуі, які больш за 25 гадоў праводзіць даследаванні Плашчаніцы.

Дзякуючы самым сучасным мікраскопам, якія дазваляюць працаваць з наначасціцамі, італьянскі навуковец зноў даследаваў узоры тканіны, узятыя з плашчаніцы ў 1970-х гадах, і знайшоў на ёй мікрачасціцы крыві, якія паказваюць несумненныя прыкметы смерці Езуса, менавіта так, як апісана ў Бібліі.

Падрабязныя вынікі даследаванняў эксперт па плашчаніцы выклаў у працы, апублікаванай у часопісе Archives of Hematology Case Reports and Reviews пад назвай Новы погляд на кроў. Доказы з Турынскай Плашчаніцы, якія адпавядаюць катаванням Езуса.

Прафесар Фанці тлумачыць, што аналізаваныя часціцы выявілі наяўнасць гемаглабіну і двух розных тыпаў крыві, якія ён пазначыў як A і B. Гэта сведчыць пра тое, што тканіна была выкарыстана кімсьці з сапраўднымі крывавымі ранамі, а не, як мяркуюць многія крытыкі плашчаніцы, створанымі з дапамогай чарніла, фарбавальніка, фарбы ці іншых тэхнік.

Даследаванне таксама выявіла наяўнасць крэатыніну ў крыві, што адпавядае цяжкім катаванням, якія перанёс Езус. Высокі ўзровень крэатыніну можна растлумачыць апошняй гадзінай жыцця Хрыста перад смерцю на крыжы, якая была выклікана зніжэннем крывацёку да нырак, абумоўленым гіпавалеміяй і сур'ёзным абязводжваннем.

Навуковец падкрэслівае, што гэтыя адкрыцці адпавядаюць апісанню ў Бібліі, у тым ліку словам з Евангелля Яна, дзе Езус кажа, што ён сасмяглы.

Даследаванне таксама выявіла два розныя тыпы крыві і сляды зямлі, тыповай для Іерусаліма, што падмацоўвае гіпотэзу аб паходжанні плашчаніцы з гэтага рэгіёна.

Гэтыя новыя вынікі зноў ставяць пад сумнеў даследаванні 1980-х гадоў, якія з дапамогай метаду датавання вугляродам C-14 сцвярджалі, што плашчаніца паходзіць з 1260-1390 гадоў.

Турынская Плашчаніца памерам 437x113x112,5 сантыметраў захоўваецца ў спецыяльнай капліцы ў базіліцы святога Яна Хрысціцеля ў Турыне. Касцёл афіцыйна не выказваўся наконт аўтэнтычнасці святой тканіны.