СВЕТ

Кардынал Эрдо: Захад губляе хрысціянскія каштоўнасці ў адукацыі

Кардынал Пэтэр Эрдо выказаў занепакоенасць зменамі ў рэлігійнай адукацыі на Захадзе, дзе замест навучання веры прапануецца агульны агляд рэлігій як культурных з'яў.

Аляксандр Амяльчэня - Vatican News

На канферэнцыі Падзеленая адказнасць – супрацоўніцтва паміж дзяржавамі і рэлігійнымі супольнасцямі ў Будапешце, арганізаванай у рамках венгерскага старшынства ў Савеце ЕС, Прымас Венгрыі выступіў з крытыкай сучасных тэндэнцый у рэлігійнай адукацыі заходнееўрапейскіх краін.

Кардынал адзначыў, што ў дзяржаўных школах Заходняй Еўропы рэлігійнае навучанне ператвараецца з выкладання веры ў "навучанне пра рэлігіі". Па яго словах, гэта вядзе да таго, што рэлігійнае навучанне становіцца "культурнай прапановай", дзе ўсе рэлігійныя перакананні прадстаўляюцца як роўныя.

Эрдо падкрэсліў, што раней у еўрапейскіх краінах панавала разуменне рэлігіі, сфарміраванае хрысціянскімі Цэрквамі. Аднак з'яўленне новых рэлігійных супольнасцей і мультырэлігійнасць грамадства ўскладняюць для дзяржавы задачу вызначэння паняццяў рэлігіі, рэлігійных супольнасцей і Цэркваў.

Іерарх звярнуў увагу на тое, што новыя рэлігійныя рухі не маюць такіх жа грамадскіх структур, цэласнага светапогляду і маральных імплікацый, як традыцыйныя хрысціянскія Цэрквы. Гэта, на яго думку, ускладняе рэалізацыю законаў аб роўным стаўленні да ўсіх рэлігій.

У канферэнцыі таксама прынялі ўдзел іншыя рэлігійныя і дзяржаўныя дзеячы Венгрыі. Дзяржаўны сакратар Міклаш Шолтэс выказаў меркаванне, што рэлігіі могуць дапамагчы знайсці адказ на "маральны крызіс Еўропы". Ён назваў сярод пагроз для кантынента "ваенную істэрыю", узмацненне ідэалогій супраць стварэння і няўдалую міграцыйную палітыку.