У Іспаніі могуць беатыфікаваць 4 тысячы мучанікаў XX стагоддзя
Марыя Валодзіна, Аляксандр Амяльчэня - Vatican News
Эксперт па беатыфікацыйных працэсах, ксёндз Хасэ Карлас Марцін дэ ла Хос паведаміў пра магчымае павелічэнне колькасці беатыфікаваных мучанікаў у Іспаніі. Гэта стала вынікам апытання, праведзенага па просьбе Дыкастэрыі па справах кананізацыі ва ўсіх дыяцэзіях краіны. Аб гэтым паведаміў партал National Catholic Reporter.
Большасць з новых кандыдатаў на беатыфікацыю – ахвяры пераследу падчас грамадзянскай вайны 1936-1939 гадоў. Аднак, як падкрэслівае эксперт, вытокі гэтых ганенняў ляжаць значна глыбей у гісторыі.
Марцін дэ ла Хос звяртае ўвагу на тое, што ўжо ў XIX стагоддзі ў Іспаніі назіралася жорсткасць да Касцёла з боку розных палітычных сіл. Гэтая нянавісць паступова пранікала ў розныя пласты грамадства, што і прывяло да масавага пераследу у перыяд Другой Рэспублікі і грамадзянскай вайны.
Эксперт падкрэслівае важнасць захавання памяці пра мучанікаў, асабліва іх здольнасць да прабачэння. Ён прыводзіць прыклад Эрмэнэгільда Кабрэры, які перад смерцю прасіў свайго ката перадаць маці кашалёк і прабачыць яго самога.
Яго гісторыя паказвае, як сем'і мучанікаў захоўваюць памяць пра сваіх блізкіх без нянавісці і жадання помсты. Гэта сведчыць пра тое, што прыклад мучанікаў можа дапамагчы ў прымірэнні і аб'яднанні грамадства.
Такім чынам, працэс беатыфікацыі іспанскіх мучанікаў XX стагоддзя не толькі ўшаноўвае памяць ахвяр рэлігійных пераследаў, але і нясе важнае пасланне прабачэння і прымірэння для сучаснага грамадства.
