СВЕТ

Біскупы ЕС: дыялог з рэлігіямі – шлях да еўрапейскага адзінства

Каталіцкія біскупы краін Еўрасаюза на пленарным пасяджэнні COMECE ў Бруселі абмеркавалі ўмацаванне дыялогу паміж інстытутамі ЕС і рэлігійнымі супольнасцямі.

Аляксандр Амяльчэня - Vatican News

На пленарным пасяджэнні COMECE, якое адбылося 27-29 лістапада 2024 года, іерархі засяродзілі ўвагу на будучыні Еўрасаюза ў святле чэрвеньскіх еўрапейскіх выбараў і сучасных геапалітычных выклікаў.

Старшыня COMECE, біскуп Марыяна Крачата, падкрэсліў у інтэрв'ю італьянскаму каталіцкаму агенцтву SIR неабходнасць пошуку шырэйшага палітычнага кансэнсусу пасля фарміравання новага складу Еўрапейскай Камісіі. "Мы павінны працаваць над умацаваннем еўрапейскага адзінства праз дыялог і ўзаемаразуменне паміж усімі бакамі", - адзначыў іерарх.

У сваім выступе Феаргас О'Беара, кіраўнік Бюро аналізу Еўрапейскага Парламента, падкрэсліў важнасць інвестыцый у рэлігійную адукацыю. "Без разумення рэлігійных традыцый і каштоўнасцей немагчыма пабудаваць эфектыўны міжканфесійны дыялог у сучаснай Еўропе", - падкрэсліў эксперт.

Удзельнікі пасяджэння таксама абмеркавалі прызначэнне аўстрыйца Магнуса Брунера на пасаду еўракамісара па ўнутраных справах і міграцыі. У яго кампетэнцыю ўваходзіць важны напрамак работы – дыялог Еўракамісіі з Касцёламі і рэлігійнымі супольнасцямі.

COMECE, якая была заснавана ў 1980 годзе са згоды Апостальскай Сталіцы, з'яўляецца голасам каталіцкіх біскупскіх канферэнцый 27 краін-членаў ЕС. Сакратарыят арганізацыі, размешчаны ў Бруселі, актыўна ўдзельнічае ў фарміраванні палітыкі ЕС, прадстаўляючы каталіцкі погляд на актуальныя пытанні еўрапейскага развіцця.