Ліванскі Патрыярх выступіў за мір і нейтралітэт краіны

Аляксандр Амяльчэня - Vatican News

У сваім традыцыйным звароце на Божае Нараджэнне з патрыяршай рэзідэнцыі ў Бкерке кардынал Бешара Раі падкрэсліў неабходнасць захавання суверэнітэту Лівана і яго абароны ад любых акупантаў.

"Наша краіна мае ўнікальную місію быць мостам паміж Усходам і Захадам, месцам сустрэчы розных культур і рэлігій. Гэта магчыма толькі пры ўмове захавання пазітыўнага нейтралітэту", - падкрэсліў мараніцкі патрыярх.

Кардынал Раі выказаў занепакоенасць наяўнасцю ў краіне дзвюх узброеных сіл. "Ліван не можа мець дзве арміі. Гэта супярэчыць самой сутнасці суверэннай дзяржавы", - адзначыў іерарх, маючы на ўвазе прысутнасць у краіне ўзброеных фарміраванняў шыіцкай арганізацыі Хезбала, якая падтрымліваецца Іранам.

Па меркаванні экспертаў, да нядаўняга часу ўзбраенне і баяздольнасць Хезбалы перавышалі магчымасці афіцыйнай ліванскай арміі. Аднак у апошнія месяцы пазіцыі арганізацыі былі істотна аслабленыя ў выніку ізраільскіх ваенных удараў і спынення пастаўкі зброі з Ірана пасля змены рэжыму ў Сірыі.

"Мы павінны выступаць за мір і стабільнасць у рэгіёне, але не праз удзел у канфліктах, а праз садзейнічанне дыялогу і ўзаемаразуменню", - падкрэсліў кардынал Раі, заклікаючы суайчыннікаў да еднасці і супрацоўніцтва дзеля будучыні краіны.

Як кіраўнік найбуйнейшай хрысціянскай Царквы ў Ліване, Патрыярх Раі адыгрывае вялікую грамадскую ролю. Маранiты складаюць, па розных даных, ад 20 да 40 працэнтаў насельніцтва.