Патрыярхі Сірыі моляцца за мірную перадачу ўлады
Аляксандр Амяльчэня - Vatican News
У сувязі з працяглым крызісам у Сірыі, Патрыярх Сірыйскай Каталіцкай Царквы Ігнацый Юсэф III Юнан звярнуўся да вернікаў з заклікам да малітвы за бяспечны і спакойны пераходны перыяд.
Падчас нядзельнай літургіі ў сваёй рэзідэнцыі ў Ліване іерарх адзначыў, што "хваля рэвалюцый супраць урада і рэжыму" Башара Асада ператварылася ў жудасную вайну з катастрафічнымі наступствамі для ўсяго народа. Ён таксама паведаміў пра свае кантакты з епіскапамі Алепа, Хомса, Дамаска і Камішлі, запэўніваючы іх у малітоўнай падтрымцы.
Сірыйска-праваслаўны Патрыярхат на чале з патрыярхам Ігнацыем Эфрэмам II выступіў з афіцыйнай заявай, у якой падкрэсліў неабходнасць забеспячэння роўнасці ўсіх сацыяльных груп і грамадзян Сірыі, незалежна ад іх этнічнай, рэлігійнай і палітычнай прыналежнасці.
Паводле агенцтва Fides, заявы рэлігійных дзеячаў з'яўляюцца рэакцыяй на "супакойваючыя" публічныя выказванні ісламісцкіх груповак, якія адыгралі ключавую ролю ў падзенні сірыйскага рэжыму. Аднак духоўныя лідары заклікаюць да асцярожнасці ў ацэнцы далейшага развіцця падзей пасля звяржэння Башара Асада.
