Прэмія Заіда: кандыдаты як апосталы надзеі ў параненым свеце
Марыя Валодзіна – Vatican News
Генеральны сакратар Прэміі Заіда, суддзя Махамед Абдэльсалам, паведаміў, што Папа Францішак ужо ў дваццаты раз прымае ў Ватыкане групу ўдзельнікаў ініцыятывы, звязанай з Дакументам аб чалавечым братэрстве, падпісаным ім у 2019 годзе разам з Вялікім імамам Аль-Азхара, шэйхам Аль-Таебам. Па яго словах, кожная сустрэча з Папам асабіста заахвочвае яго ў намаганнях па прасоўванні каштоўнасцяў чалавечага братэрства. "Наша жаданне працягваць ісці па гэтым шляху заўсёды ўзмацняецца, калі мы сустракаемся з Папам Францішкам", - сказаў суддзя Абдэльсалам.
Кардынал Пітэр Тарксан падкрэсліў, што журы Прэміі разглядае каля 100 кандыдатаў, якія ўвасабляюць імкненне чалавецтва да міру. Ён назваў гэтых кандыдатаў апосталамі надзеі, якія нясуць ідэю братэрства.
Сярод асноўных праблем, на якія звярнулі ўвагу ўдзельнікі, - голад і мілітарызацыя. Гендырэктар Сусветнай гандлёвай арганізацыі Нгозі Аконджа-Івеала адзначыла, што 700 мільёнаў чалавек, у тым ліку 300 мільёнаў на афрыканскім кантыненце, кладуцца спаць галоднымі.
Былы прэзідэнт Сенегала Макі Сал падкрэсліў, што наш свет поўны эгаізму, разладаў і канфліктаў, у той час як Прэмія Заіда нясе пасланне братэрства, якое ахоплівае ўсе рэлігіі і этнічныя групы.
Былы прэм'ер-міністр Іспаніі Хасэ Луіс Радрыгес Запатэра адзначыў, што сучасны свет перажывае найбольшую колькасць канфліктаў з часоў Другой сусветнай вайны. "Нам патрэбна новая стратэгія і бачанне нашага свету. Нам вельмі неабходна мабілізавацца ў імя міру", - сказаў ён, дадаючы, што “мы адна чалавечая сям'я”.
Кардынал Тарксан нагадаў этымалогію слова братэрства, растлумачыўшы, што яно паходзіць ад грэчаскага слова adelphos, што літаральна азначае "з аднаго чэрава”. "Немагчыма, каб людзі, якія выраслі ў адной сям'і, мелі розную годнасць", - сказаў ён. Па словах іерарха, прэмія Заіда за чалавечае братэрства з'яўляецца напамінам аб тым, што кожны можа імкнуцца зрабіць свет лепшым. "Кожны можа стаць змагаром за мір", - сказаў ён.
