Шэдэўры італьянскага мастака Гверчына на выставе ў Scuderie del Quirinale ў Рыме

СВЕТ

Невядомы Караваджа і Шагал: унікальныя мастацкія выставы ў Рыме

Тры выключныя мастацкія выставы адкрыліся ў Рыме: невядомы партрэт работы Караваджа, 122 творы Герчына і Белае Укрыжаванне Шагала прадстаўлены публіцы.

Аляксандр Амяльчэня - Vatican News

Рымскія музеі прапануюць наведвальнікам унікальную магчымасць пазнаёміцца з шэдэўрамі сусветнага мастацтва, якія раней не выстаўляліся публічна або былі цяжкадаступныя для шырокай публікі.

Знакавая падзея адбылася ў новым музейным комплексе Museo del Corso, дзе прадстаўлена Белае Укрыжаванне Марка Шагала. Арцыбіскуп Рына Фізікела, адкрываючы выставу, падкрэсліў: "Размяшчэнне гэтага твора ў свецкай прасторы, а не ў касцёле, мае глыбокі сэнс – яго пасланне павінна дасягнуць як мага больш шырокай аўдыторыі". Карціна, напісаная ў 1938 годзе, з'яўляецца магутным сімвалам надзеі і рэлігійнага адзінства, нясе моцнае пасланне аб абароне чалавечай годнасці і дыялогу паміж культурамі.

У Palazzo Barberini ўпершыню дэманструецца партрэт Мафэа Барберыні пэндзля Караваджа. Куратар выставы Томас Клемент Саламон адзначае: "За жыццё Караваджа напісаў шмат партрэтаў, асабліва падчас свайго знаходжання ў Рыме, але амаль усе яны былі страчаны ці знішчаны. Гэты твор запаўняе істотную прагаліну ў нашым разуменні творчасці мастака". На партрэце Мафэа Барберыні, будучы папа Урбан VIII, прадстаўлены ў 30-гадовым узросце, седзячы ў крэсле з лістом у руцэ.

Найбольш маштабная экспазіцыя разгарнулася ў галерэі Scuderie del Quirinale, дзе прадстаўлена выстава Герчына. Эпоха Людавізі ў Рыме. Куратар Катэрына Вольпі тлумачыць: "Мы імкнуліся паказаць не толькі творы Герчына, але і ўвесь культурны кантэкст эпохі Папы Грыгорыя XV". На выставе прадстаўлены 122 творы з 68 найбуйнейшых музеяў свету, сярод якіх работы Гвіда Рэні, Даменікіна, Альбані, Ланфранка, Берніні і іншых майстроў барока.

Асаблівую каштоўнасць прадстаўляе магчымасць наведаць пакоі Casino Ludovisi, дзе захавалася знакамітая фрэска Герчына ў Sala dell'Aurora. Куратар Рафаэла Марсэлі падкрэслівае: "Гэта месца натхняла цэлыя пакаленні мастакоў і было сапраўдным перакрыжаваннем культурных уплываў свайго часу".

Выставы будуць даступны для наведвальнікаў да пачатку 2025 года: Белае Укрыжаванне Шагала – да 27 студзеня, партрэт Караваджа – да 23 лютага, а экспазіцыя, прысвечаная Герчына – да 26 студзеня. Усе тры выставы з'яўляюцца часткай культурнай праграмы, звязанай з Юбілейным годам у Каталіцкім Касцёле.