Прэм'ер Італіі наведала Папу ў клініцы

Прэм'ер-міністр Італіі Джорджа Мелоні наведала Папу Францішка ў рымскай клініцы Джэмэлі, дзе ён праходзіць лячэнне, і адзначыла яго бадзёры настрой і пачуццё гумару.

Аляксандр Амяльчэня - Vatican News

Як паведамляе канцылярыя прэм'ер-міністра Італіі (Palazzo Chigi), падчас візіту яна перадала Пантыфіку пажаданні хуткага выздараўлення ад імя ўрада і ўсяго італьянскага народа.

"Я вельмі задаволеная тым, што знайшла яго бадзёрым і актыўным, - падзялілася ўражаннямі Джорджа Мелоні. - Мы жартавалі, як заўсёды. Ён не страціў свайго легендарнага пачуцця гумару".

Візіт італьянскага прэм'ера адбыўся ў час, калі Папа Францішак праходзіць лячэнне ў клініцы Джэмэлі.