Шлях Святога Якуба выйшаў за межы Еўропы

Шлях Святога Якуба выйшаў за межы Еўропы. 20 сакавіка 2025 года ў іспанскім анклаве Мелілья на ўзбярэжжы Марока была ўрачыста адкрыта “Вія Русадзір” (Vía Rusadir) – першая афрыканская частка маршруту.

Аляксандр Панчанка - Vatican News

Падчас цырымоніі інаўгурацыі быў адкрыты каменны знак, дастаўлены з Галісіі і ўсталяваны каля Брамы Святога Якуба ў гістарычным раёне Мелілья-ла-Вьеха. На ім змешчаны традыцыйныя сімвалы Каміна-дэ-Сант’яга: ракавінка і жоўтая стрэлка, а таксама шыльда з указаннем дакладнай адлегласці да Сант’яга-дэ-Кампастэлы – 972,09 кіламетра.

З 21 сакавіка пілігрымы, якія пачынаюць свой шлях па “Вія Русадзір”, могуць атрымаць афіцыйны штамп у свае пілігрымскія пасведчанні. Яго ставяць у маяку Мелілья-ла-Вьеха.

Шлях Святога Якуба – гэта сетка пілігрымскіх маршрутаў, якія вядуць у іспанскі горад Сант’яга-дэ-Кампастэла, дзе, паводле падання, знаходзяцца рэліквіі святога Якуба. Найбольш вядомыя маршруты – Каміна Франсэз (з Францыі праз Пірэнеі), Каміна-дэль-Нортэ (па паўночным узбярэжжы Іспаніі), Каміна Прымітыва (які лічыцца найстарэйшым маршрутам) і Вія-дэ-ла-Плата (з паўднёвай Іспаніі).

“Вія Русадзір” стала першым афіцыйным маршрутам Каміна-дэ-Сант’яга за межамі Еўропы. Ён звязвае Мелілью з традыцыйнымі іспанскімі шляхамі і падкрэслівае гістарычныя і культурныя сувязі паміж Афрыкай і Іспаніяй. Пілігрымы, якія ідуць гэтым маршрутам, перасякаюць Міжземнае мора і дасягаюць Андалусіі, дзе могуць далучыцца да класічнага шляху. Назва маршруту паходзіць ад старажытнай назвы Мелільі, дадзенай гораду фінікійцамі ў VIII стагоддзі да Нараджэння Хрыстова.